Mega Boxing: A ṭha leh ṭha lo an inthliar zel

Sailo Agencies-MIZBA Mega Boxing 2025 chu R. Dengṭhuama Indoor Stadium, Mualpuiah khelh chhunzawm zel a ni a, a ṭha leh ṭha lo an inthliar chho zel. Bout hmasa berah Thentlang tlangval Lalsiamtluanga'n Manipur boxer Kaplian Zou a hneh nghal. Siama hi TD Academy-a training a ni a, Serchhip District level-a gold la tawh a ni.

Round tir lam a nih avangin experience nei lo an la ṭhahnem zawk a, chutihrualin infiamna dang ti thei an awm nual. Seling tlangval Lalnunpuia'n Lamka aṭanga rawn tel Thangbiakdika a hneh a, Nunpuia hi national level-ah judo leh wushu-a gold la tawh a nih bakah national wrestling-a bronze la tawh - tawnhriat a ngah hle.