Italy tan World Cup khelh theihna la inhawng

Europe aṭangin FIFA World Cup khel tur ram 12 a chiang tawh a, hmun ruak pali dang chu playoff hmangin zawn a ni dawn. Playoff-ah hian group tin aṭanga pahnihna ṭheuh bakah Nations League aṭangin team li an tel dawn a, team 16-in hmun ruak pali hi an inchuh dawn tihna a ni.

Norway laka mualpho Italy tan playoff hmangin World Cup khelh theihna kawng a inhawng a, an kalkawng hi eng ang chiaha harsa tur nge tih chu vawiin tlai dar 4:30-a fixtures pawh hunah a chiang ang. FIFA hmunpui Zurich, Switzerland-ah tie draw hi neih tur a ni.

Tute nge tel dawn?

Group tina pahnihna chu Italy, Denmark, Turkey, Ukraine, Poland, Wales, Czech Republic, Slovakia, Republic of Ireland, Albania, Bosnia and Herzegovina leh Kosovo te an ni. Nations Legue aṭangin ram pali Romania, Sweden, North Macedonia leh Northern Ireland te an awm bawk a, anni hi pot 4-ah dah an ni.

Group tina pahnihnate hi FIFA ranking-a an dinhmun a zirin pot pathumah pali zela ṭhendarh an ni a, pot khata mi hi group khatah an awm thei tawh lo. Fixtures pawh hunah ram 16 hi path paliah (A-D) ṭhendarh an ni ang a, path pakhat zelin quota pakhat an nei ang.

Path tinah hian semifinal leh final a awm dawn tihna a ni a, Italy leh playoff khel tur ram dang tan World Cup khel turin vawi hnih chak a la ngai. Chutihrualin vawi khat pawh an chak lo a nih chuan beiseina a tawp nghal dawn.

Playoff semifinal hi March 26, 2026-ah khelh a ni ang a, final hi March 31, 2026-ah khelh a ni ang. Nakkum March thlaaah Europe aṭanga World Cup khel tur a hriat kim ang.