Anfield-ah 'Lal Thar' a piang?

Liverpool rawlthar duhawm Ben Woodburn chuan Michael Owen record khum turin Thawh-lehni zan khan Leeds United lamah goal a khung a, Reds tana goal khung thei naupang ber a ni ta - Liverpool hian a vawi 17 nana League Cup semifinal lut turin an mikhual Leeds chu 2-0 in an hneh a, he inelnaah hian anni aia a thiam pali zinga tel ngun an awm lo.

Reds tan Divock Origi chuan Trent Alexander-Arnold hnen aṭanga a ball hmuh chu minute 76-naah an goal hmahruai ni turin a khung a, Woodburn-a'n minute 81-naah chak nemngheh nan a khung ve leh bawk - Wales Under-19 international hi kum 17 leh ni 45-a upa a ni a, Owen-a'n Reds tana goal khung naupang ber record a lo chelh tawh chu ni 98-a naupang zawk nichungin a khum.

Liverpool tan inkhel ṭantir lamah Georginio Wijnaldum chuan post a pet per a, Leeds tan winger Kemar Roofe chuan post a pet per ve bawk a, Kyle Bartley chuan vengtu nei lo kara a tauh luh theih loh bakah Hadi Sacko chuan a hun ṭha neih a chhawr thei lo bawk.

Lal thar chu?

Philippe Coutinho, Roberto Firmino, Daniel Sturridge leh Adam Lallana te hliam vanga an inlan theih loh avangin Klopp-a'n tlarhma lamah rawlthar rual a hmang a, an player pawimawh rual tel loin Reds rawlthar rual an hriam tawk lo. Minute 67-naah Woodburn a tlan lut a, Sunderland an hneh ṭuma Reds tana a match hmasa ber kheltu inlan hnuah Liverpool tlarhma an nung sawt.

Origi-a'n goal a khung a, Woodburn-a'n a chhunzawm ve nghal. Liverpool tana inlan thei naupang pathumna Woodburn-a goal khung lai hi a record a khum Owen chuan a hmunah a en a, An-field-a thawm chu ring tak a ni.

Klopp a fimkhur

Liverpool tana a match hmasa ber a khelh aṭanga ni thum hnu lawkah Woodburn-a'n Reds tan goal a khung a, Jurgen Klopp chuan a nau hi media lamin a hmakhua an tih chhiat sak ang tih a hlau hle.

Reds manager chuan, "Ka buaina awmchhun chu media ho hi a ni a, heivang hian Woodburn chungchang sawi vak pawh hi ka duh lo. Hmabak hlen tur tam tak a la nei a, a pawimawh hmasa ber chu a theih china rei mipui nawlpui lak aṭanga lak hran hi a ni," tiin Reds academy graduate chu a hun hmain mipuiin an bawr lutuk ang tih a hlau.

German coach chuan sawi chhunzawmin, "Woodburn khan goal a khung avangin 'i ti ṭha e' tiin ka lawmpui thu ka hrilh. Mahse, a goal kha khung harsa a ni lo a, keipawh ni ila khatiang dinhmunah kha chuan ka khung ang," tiin a nau chu media laka lakhran a tum hle.

Vanduai Magpies

Hull City khelmuala lenglut Newcastle United-in inkhel thunun mah se an vanneih ṭum a ni lo a, hun pangngaia goal khat ve ve khunga an inhnehtawk hnuin penalty-ah 3-1 in an tlawm. Hull forward Dieumerci Mbokani chu minute 89-naah hnawhchhuah a nih avangin Premier League club hian extra time pumpui chu player kim loin an khel.

Magpies-in minute 98-naah Mohamed Diame hmangin goal hmahruai an khung a, an hlim authawm pawh a reh fel hmain Hull-in minute 99-naah an si phurh a sut nghal. Penalty hmanga chak zawk zawn a nih hnuah Hull keeper Eldin Jakupovic-a'n vawi hnih a dang a, 61% ball changa shot 32 nei Magpies an tlawm.