Football khawvel vêl ṭaptu Chapecoense

Chhiatna chanchinin min ṭhawn rualin kan player ṭhenkhat nupuite chu nikhaw hre loin an tlu a, an pasalte football boot vuan chunga ṭap ngawih ngawih an awm bawk,"

- Chapecoense goalkeeping coach

Marcelo De Quadros Kunst

Kum 2009 kha chuan Brazilian fourth division-ah an la khel ve lauh lauh a, kum 2016 a lo thlen meuh erawh chuan South America-a club football inelna sang ber dawttu Copa Sudamericana final an lut der tawh - Euopa League tlukpui inelna final lut tura Argentine club San Lorenzo an hneh
ṭum khan Chapecoense player-te chu hlimin an lam a, an zai a, an club chanchina chhiat tawhna rapthlak ber tawng turin an ke an pen mek tih reng an hre lo.

Ni nga a liam a, Chapecoense chanchin-thar chu Colombia khawpui Medellin pana chhuak an player 22 chuanna thlawhtheihna chetsual thu a ni. Hmanni lawka lawm avanga ṭapte mittui kha lungngaihna mittui in a bual hnan a, an hlim au thawm pawh a reh fel hmain lungngai au thawm leh ṭap ri chu an ri hriat a ni ta - khawvelin a sun a, a hrethiam lo a, hriatthiam chi lah a ni hek lo. A na a ni.

Sao Paulo khawpui aṭanga Colombia lam an pan dawn khan Chapecoense manager Cadu Gaucho chuan, "He club chanchina kan match pawimawh ber tur a ni," tiin an final khelh tur a thlirlawk a, club official facebook page lamah pho chhuah a ni bawk - mah se chu match pawimawh chu engtikahmah a hmachhawn leh tawh ngai dawn si lo! Copa Sudamericana final an luh zana, "Tunah hian ka thi a ni pawhin thlamuang takin ka chawl thei ang," tia a hlimzia puang chhuaktu coach kha vawiinah chuan a hahchawl ta.

Mangṭha Danilo

Thawhlehni zinga thlawhtheihna chetsual hnu lawkah mi 81 chuanga mi panga dam chhuak angin sawi ni mah se Colombia disaster management agency lam chuan thu chhuak thar neiin thlawhnaa chuang khualzin zat hi mi 77 an nih thu an sawi a, ticket nei sa mi pali an chuang lo.

A tirah mi panga dam chhuak angin sawi ni mah se mi paruk an dam chhuak tih finfiah a ni a, Chapecoense player zingah defender Alan Ruschel, reserve goalkeeper Jackson Follman leh defender Helio Zemper te an dam chhuak a, goalkeeper Danilo chu a tirah dam chhuak zinga puan ni mah se damdawi in thlenpui a nih hnu lawkah a thi.

Kum 31-a upa keeper hian a thih hmain a nupui biak a duh thu a sawi a, phone hmanga a nupui a biak hnu lawkah hian a thi ta a ni. Kar hmasa lawk kha chuan social media lamah 'ka hmangaih nen' tiin an nupa thlalak a pholang a, vawiinah erawh in hmu leh tawh ngai lo turin a kalsan ta.

Danilo hian a thih hmain, "Isu, ka chhungte chu Nangman lo enkawl ang che. Ka ṭhian ṭhenkhatten vanah min hmuak a, goalkeeper an mamawh a nih khi," tiin khawvel a mangṭha.

In tan nomawi

Chapecoense-in chhiatna rapthlak an tawk a, Copa Sudamericana final-a an khingpui tur Atletico Nacional chuan South America-a football thuneitu sang ber CON-MEBOL hnenah champion nomawi chu Chapecoense hnena hlan mai turin an thlen!

Brazilian club Flamengo, Palmeiras leh Sao Paulo te chuan pawisa ngai loin Chapecoense hnenah an player-te loan hmanga an lak theih tur thu an hrilh a, Sao Paulo chuan Chapecoense chuan an chhiat tawhna aṭanga insiamṭha leh tura hun an duh dawn avangin season thum chhung chu relegate thei lo se an duh thu an sawi.

Kum 1958 Munich thlawhtheihna chetsual vanga Manchester United player pariat zetin an nunna an chan ṭum khan Liverpool leh Nottingham Forest chuan an elpui club hnenah hian an duh phawt chuan an player-te loan hmanga an hawh theih tur thu an lo hrilh tawh.

Mittui a luang

Football khawvela player ropui ber ang hiala sawi ṭhin Pele chuan, "Brazil football chuan lu a sun mek a ni. Channa nasa tak a ni a, nunna chan ta te a pawi ka ti a, an chhungte ka tawrhpui takzet a ni. Thlamuangin chawl rawh se," tiin a ziak.

FIFA president Gianni Infantino chuan, "Football tan chuan vawiin hi ni lungchhiatthlak tak a ni a, he hun harsaah hian vanduaina tawk chhungkua te ka tawrhpui takzet a ni. FIFA chuan he chhiat tawhnain a nghawng Chapecoense, football chhungkua leh media organisation te a tawrhpui takzet a ni," a ti.

Ronaldinho chuan, "Chhiatna tawk chhungkua te hnenah chakna thar lo awm se, Pathian chuan he harsatna karah hian thlamuan che u rawh se," a ti a, Kaka chuan, "Ka ṭawngṭainaah ka hre reng che u a, ka tawrhpui takzet che u a ni," a ti thung.

Chapecoense player thi zingah David Luiz-a khelhpui ṭhin Arthur Maia a tel a, Chelsea defender chuan, "Kan kiangah i awm ve tawh lo tih hre tura ṭhan harh chu a hrehawm a, he chanchinthar duhawm lo zet hian thinlung a tikehsawm a, kan zinga i awm ve ta lo hi awih a har a ni," tiin a
ṭhianpa a thlah ve bawk.

Chapecoense dintu Alvadir Pelisser thusawi hian an lungngaihna a sawi fiah chiang ber a, a runthlak em em bawk - Mi zawng zawng mumang ram chu a tawp ta. Chhungkua kan ni a, tun thlengin kan hun tawn hi kan la hrethiam lo a ni.

Football club chhiat tawhna

Kum 1949 khan Torino chuan an squad pumpui thlawhtheihna chetsual vangin an lo chan tawh.

Kum 1958 khan Manchester United chuanna thlawhtheihna chu a chesual a, mi 23-in nunna chanin heng zinga pariat hi United player an ni.

Kum 1987 khan Peruvian club Alianza Lima te chuanna thlawhtheihna chu Pacific Ocean-ah a tla a, dam chhuak an awm lo.

Kum 1993 khan Zambia national team te chuanna chu a chesual a, Gabon luipuiah tlain dam chhuak an awm lo.

Tawi

• Chapecoense player pakua Alejandro Martinuccio, Nenem, Demerson, Marcelo Boeck, Andrei, Hyoran, Nivaldo, Moises leh Rafael Lima te chu zin zingah an tel ve lo.

• Goalkeeper Marcelo Boeck chu a birthday lawm vangin a zin ve lo.

• Alejandro Martinuccio hi hliam vanga zin ve lo a ni a, Argentine striker hian, "Khawngaih takin ka ṭhiante tan lo ṭawngṭai ru," tiin chhiat an tawh hnu lawkah mipui a ngen.

• Chapecoense manager Cadu Gaucho fapa Matheus Saroli chu zin ve tur zingah tel mah se a passport a theihnghilh avangin thlawhtheihnaah a chuang ve hman ta lo a, a vanneih phah ta a ni.

• Thlawhtheihnaa chuang zinga 21 chu journalist an ni a, paruk chu Fox Sports Brasil journalist te niin a bak zawng hi Globo network-a thawk an ni thung.

Chapecoense fan mipa naupang chu chhiat tawh thu a hriat rualin stadium-ah a kal nghal a, a 'hero' te an inlan leh tawh ngai lohna tur khelmualah ngui takin a ṭhu