Han sawi dan vak ka thiam lo - Tluangtea

Bengaluru midfielder Lalremtluanga Fanai-in a inrin loh lai takin ram tana inlan tura kohna a dawng a, Blue Tigers squad a zawm hmasak berah ram tan a inlan nghal bawk!

Khalid Jamil-a kaihhruai India hian November 18, Thawhlehni zan khan Asian Cup qualifier-ah Bangladesh an hmachhawn a, Blue Tigers hi 1-0 in tlawm mah se, Mizoram tan erawh zan chhinchhiah tlak a ni.

Minute 86-naah Suresh Singh thlakin Tluangtea hi luhtir a ni a, ram tana a match hmasa ber a ni. Tluangtea chuan, "India tana inlan meuh chu a lawmawm khawp mai. Sawi dan vak pawh ka thiam lem lo.

"Ka lo châk ve em em ṭhin a ni a, hetiang taka ka lo châk ṭhin tih hlawhtlin a ni ta hi chu lawm tak ka ni," tiin Vanglaini a hrilh.

Bawngkawn tlangval hi Mizoram player, ram tana inlan thei 19-na a ni. Mizo player zingah squad-a koh, mahse, India tan khelmual lut ta chiah lo engemaw zat an awm bawk.

Tluangtea chuan an inkhelh dawnah India tan inlan nghal chu a inrin tho thu sawiin, "Ka position-a khel ṭhin ho an start nghal vek a, khatiang a nih kha chuan kei pawh inlan nghal kha chu ka inbeisei," a ti.

Bengaluru midfielder chuan ram tana inlan zel tura a beih tur thu Vanglaini hrilhin, "Kan khelh ṭhat dan a zira koh kan ni ṭhin a, chuvangin ram tan ka inlan zel dawn em, tih hi sawi lawk a harsa.

"Mahse, hliamin min tlakbuak a nih loh chuan inlan zel thei turin, tun aia nasain ka bei ang," a ti a, ram tana vawi khat chauh inlanah duhtawk mai a tum lo.

Bengaluru academy chhuak Tluangtea hian season hmasa khan Bengaluru tan ISL-ah match 26 ngawt a khel thei a, kum 21 mi chauh a la nih avangin hmabak a nei êng hle.