AFC 'A' Licence nei thar Samuel

Bungkawn pa Samuel Lalrinngheta'n Asian Football Confederation 'A' Licence coach a pass a, Mizo zinga AFC A Licence nei thei pasarihna a ni.

AFC A licence hi tunah module thuma ṭhen a ni a, Samuel-a tih lai hian module hniha ṭhen niin Kolkata ve veah neih a ni. Module 1 hi nikum November 28- December 13, 2024 khan neih a ni a, module 2 hi kumin March 18-30, 2025-ah neih a ni leh bawk.

Samuel hi Mizoram tan National BC Roy Trophy-ah kum 2008 khan nomawi a chawi tawh a, kum 2016 khan AIFF D Licence neiin coaching a luhchilh ṭan. Kum 2007 khan Chennai-ah Mizoram team chu Khelo India-ah hruaiin a champion pui a, 2018 National Sub Junior NE Zone Qualifying-ah pawh Mizoram hruaiin final round a thlenpui a, chhungkaw thil avangin final round-ah a enkawl thei lo.

Mizoram hmeichhe team pawh ṭum hnih a hruai tawh a, National Under 17 leh Senior womens-ah a hruai tawh. India rama academy ṭha Sudeva-ah pawh Samuel hian coach hna a thawk tawh a, tunah hian Aizawl FC youth team-ah head coach a ni mek. Tun season-ah player naupang rual enkawl chungin Aizawl DFA First Division-ah semifinal a thlenpui.

Mizo zingah AFC A Licence nei pasarih an awm ta a, Samuel-a hma hian Danny Lalduhawma (Aizawl Venglai), K. Lalrindika (Mission Vengthlang), Lalruatliana Sailo (Vaivakawn), Victor Lalbiakmawia (Mission Vengthlang), Stephan Tawnthansanga (Muthi) leh R. Lalruatfela (Kolasib) ten AFC A Licence an nei tawh a ni.

Football licence-ah hian A licence hi sang ber dawttu niin, hemi chungah hian Pro Licence awmin Mizo zingah nei an la awm lo. India ramah chuan football coach ni turin AIFF D Licence aṭanga bul ṭan a ngai a, chumi chungah AFC C licence, B licence, A licence leh Pro licence te a awm.