Mega Boxing 2025 tel turin R. Mala lo haw

Sailo Agencies-MIZBA Mega Boxing 2025 chu R. Dengṭhuama Indoor Stadium, Mualpuiah khelh chhunzawm zel a ni a, inelna boruak pawh a nung chho zel. Indian Army boxer Malsawmtluanga chuan inelna hmachhawn turin Mizoram a rawn thleng tawh a; December 3, Nilaini zanah a rawn inlan ang.

Indian Army boxer R Mala hian kum 11 a nih aṭangin boxing a luhchilh ṭan a, coach Lalfakzuala leh CH Lalmuanpuia te hnuaiah inzirin Mizoram chhunga boxing inelna a tel tawhnaah gold la vekin, gold 20 chuang a awrh tawh a ni.

Kum 2018 khan kum 17 mi lek niin sports quota-in Indian Army-ah a lut a, R Mala hi Indian Army-ah pawh a che ṭha zui hle. Kum 2021 khan Indian Army best boxer-a thlan a ni.

National Level-ah pawh R. Mala hian sulhnu a nei ṭha. 2022 National Games-ah Mizoram tan silver a hnek chhuak a, nikum khan Senior National Boxing Championship ah Mizoram tan bronze a hnek chhuak leh bawk. R Mala hian national level-ah silver medal pahnih leh bronze medal pathum a la tawh a, October 2025-a Inter Services Boxing Championship-ah khan Silver Medal a la leh bawk.

Kuminah R. Mala hi India ram aiawh tura boxer ṭha thlanchhuahte chherna hmun India Camp-ah te pawh koh a lo ni tawh a. Tunah hian Army Sports Institute, Pune-ah senior boxer Laldinmawia te, weightlifter Jeremy Lalrinnunga te nen post mek an ni.