Tennis Hall of Fame-ah Federer

International Tennis Hall of Fame-ah Roger Federer an dah lut a, 'Big Three' tia sawi zing aṭanga hall of fame-a awm hmasa ber a ni.

Kum 44 mi Federer hian kum 2022 khan tennis khelh a chawlhsan a, ATP level-ah title 103 zet a la. Swiss tennis star hian open era-ah Jimmy Connors (109) chauh a tluk lo.

Federer hi Grand Slam singles-a vawi 20 title la thei hmasa ber a ni a, 'Big Three' tia an sawi dang pahnih Novak Djokovic (24) leh Rafael Nadal (22) ten a record ropui tak hi an rawn khum tawh thung.

Swiss tennis star Federer chuan, "International Tennis Hall of Fame-a khawvel player ropui dang zinga min telh hi ka tan chuan chawimawina ropui tak a ni. Ka inkhelh chhung zawngin tennis history hi ka ngaihlu a, ka hmaa lo tel tawhte hi ka entawn ṭhin," tiin a sawi.

Federer chuan sawi chhunzawmin, "Tennis chhungkuain ka hnathawh min hriatpui hi ka lawm a, nakkuma chawimawina hlan hun pawh ka nghakhlel hle," a ti. Nakkum August 27-29 hian Newport, Rhode Island, United States-ah Hall of Fame-a Federer dah luhna hun hi hman a ni ang.