Mega Boxing 2025: Boruak a 'hot' chho zel, Dinmawia a rawn thleng

Sailo Agencies-MIZBA Mega Boxing 2025 chu R. Dengṭhuama Indoor Stadium, Mualpuiah khelh chhunzawm zel a ni a, boxer ṭha an rawn thlen belh zel bawk. Experience nei lo boxer tan fixture a hautak a, ni zawnin an khel chho mawlh mawlh a, rilru huaisen a pawimawh chho dawn.

Mega Boxing-ah kum 14 mi Benjamin Lalthantluanga a rawn inlan a, Khatla East naupang hian Nghalchawm tlangval Moses Lawmkimthang (kum 18) chu split decision-in a hneh. Benjamin hian bout hnihah hnena a chang tawh a, Lalthanmawii leh James Lalrintluanga te fapa, pawl sarih zirlai hian ngaihven a hlawh chho dawn.

Eizawnna atana amateur boxing hmang Laldinmawia pawhin Aizawl a rawn thleng tawh a, Tuipui tlangval hi seeded-ah dah niin, November 28, Zirtawpni zanah a rawn inlan ang.

Dinmawia hi Mizo boxer zinga sulhnu nei ṭha ber zinga mi a ni a, national level-ah gold panga, silver pahnih leh bronze pakhat a la tawh. India aiawh te pawha feh chhuak tawhin, gold pakhat, silver pahnih leh bronze pakhat a la tawh bawk.

Boxing thiam vangin Dinmawia hi kum 2015 khan Army-ah a lut a, Naib Subedar rank a bel mek. Mizoram leh India ram chhunga sulhnu nei ṭha tak Dinmawia hi Mega Boxing tihlutute zinga mi a ni ang.