Silly Point: Cricket Khawvel - Ramchhung leh Rampawn

Vawiin lamah Gauwhati-ah India leh South Africa ten Test match vawi hnihna an khel dawn. Ring herh vangin captain Shubman Gill a inlan theih loh hmel a, Guwahati-ah hian "rank turner" ni thumnaa zo leh mai tur test inkhel kan hmu leh ange maw? India batting line up-ah hian vei vuak an ṭhahnem mah mah a , hei hian technical zawngin team balance a tibuai zawk em aw ka ti ve deuh! I lo thlir phawt ang.

Ashes

Cricket series-a ngaihhlut ber leh upa ber Ashes 2025/26 chu Australia thlen kum a ni a. Perth-ah nimin zing khan khelh ṭan a ni a. Inhliam vanga an innghahna player Pat Cummins leh Jose Hazelwood tel loin Aussies hoin bul an ṭan ṭha viau. Tun thlasik chu cricket tui mi tan mit leh beng a tlai dawn e.

Mizoram Cricket

Mizoram Under 23-te final-ah Meghalaya lakah an tlawm. Elite-ah lut zo ta lo mah se, kum rei lote chhungin final kan han lut ve thei ta hi hmasawnna ropui tak a ni. Ball sen inkhel an la hmabakah pawh dinhmun sangah an inhlangkai zel turah ngai ang?

Ranji

Patna khawpuiah Ranji group stage final round ropui Mizo tlangvalten min hlui a. A chak zawk zawk final lut, draw game a nih chuan final lut lo ve ve Bihari & Mizo tlangval te ni khatna aṭangin top gear-in an innuai nghal.

Ni li chhung inkhela run 1500 chuang vuakchhuahah result la awm cheu 'multi day cricket' hi tui let hnuah awm tak maw? A ni lina session tawp berah Mizoram team-in 248 runs target siamsakin an declare a. Over 30 a la awm. Patna khawpuiin Blockbuster T20 tournament lo thleng mai tur urlawkna inkhel ropui an hmu. Bihar an dingchang ta zawka, chak loh pawh huama chak tuma declare ngam Mizoram team an huaisen ka ti lo thei lo.

Captain Joseph Lalthankhuma innings hniha century siam zawn thei Mizo player hmasa ber kan han nei hi thil namai a ni lo a . International cricket-ah pawh thil thleng zen zen lo a ni.

Pune lamah T20 inkhel turin Mizo tlangvalte an inkulh leh tawh a. Bihar chak tak avanga lungawi vak lo Meghalaya nen an intum hunah boruak chu a lum ve khawp ang le. Engpawh nise, tun ang zela kan Mizoram team administration & players te hma an sawn chuan BCVI tehfung ber leh ngaihhlut ber Ranji Trophy-ah elite division-a Mizoram luh hun hi a hla tawh lo tih a chiang.