Palmer a la chawlh rih dawn - Maresca

Chelsea manager Enzo Maresca chuan an player pawimawh Cole Palmer an la chhawr theih loh tur a sawi. Blues hian zanin dar 6:00 hian Burnley an tlawh dawn a, Clarets zawh hian Barcelona leh Arsenal an hmachhawn lehnghal dawn.

Maresca chuan, "Ṭhal hliam vanga hun rei tak a chawlh hnuah a rawn kir hnai a, mah se anmahni in lamah a chetsual avangin a la chawlh rih a ṭul dawn. A hliam dan tak hi kan hre lo a, mah se karleh lam thlengin a la khel thei dawn lo tih kan hria," tiin a sawi. Palmer hi in lamah a ke zungpui a chhuih avangin hliam a neih belh nia sawi a ni.

Manchester City aṭanga Chelsea zawmtu Palmer hian September 21, 2025-a Manchester United a hmachhawn ṭumin hliam vangin lakchhuah a ni a, hemi hnu hian London club tan a la inlan leh lo. Maresca hoten Palmer a tel loa khelh an zir chhunzawm a ṭul.

Chelsea hian an match hnuhnung berah Wolves 3-0 in an sawp a, zanina an hmachhawn tur Burnley lakah hian match hnuhnung 11-ah an tlawm tawh lo. An inkhelhna tur Turf Moor-ah pawh Blues hian record an nei ṭha a, match hnuhnung parukah an chak vek. Burnley-in an muala Chelsea an hneh chu kum 1983 daih tawh kha a ni.