La Liga boruak a 'hot' thar
International break hma Spanish La Liga inkhelah beisei loh result a thleng a, chu chu Real Madrid-in rin loh taka Rayo Vallecano 0-0 a an inhnehtawkpui chu a ni.
Real Madrid chak loh lai hian an elpui Barcelona erawh an chak thung a, hei hian Spanish top flight league-a team inum boruak a chhem nung thar a tih loh theih loh.
La Liga-ah match 12 khelh tawh niin, Real hian table chung ber an la luah a, mahse, pahnihna Barcelona aia an sanna hi point thum chauh a ni tawh thung.
Atletico Madrid hian season hmang ṭha lo viau mah se, thaibo tawp theih an ni bik lo - table-ah palinaah an awm mek a, point ruk chauhin Real hi an phak lo. Spanish club liante hi tun kar tawp inkhelah an inlan vek dawn.
Hello Camp Nou
Barcelona fan-ten tun kar tawp inkhel tur atan phurna tak an nei - a chhan chu an stadium hmingthang Camp Nou-a an kir leh dawn tak vang a ni a, zanin dar 8:45-ah Athletic Bilbao an mikhual ang.
Catalan club hi May 2023 hnuah khan an khelmual hi an chei ṭhat avangin an inlan leh tawh lo. Tun season-ah bul ṭan nana hmang hman turah an inngaih laiin an hman ta lo a, zaninah an hmang dawn ta.
Camp Nou-a kir leh hmasak bera tlawm nghal chu Barcelona tan thil tlawm thlak tak a ni dawn a, zaninah an ṭhat dan bera inlan an duh dawn. Mahse, Lamine Yamal hi international break-ah pawh Spain tana feh chhuak thei lo kha a ni a, hliam vangin Raphinha a la chawl mek bawk.
Barca boss Hansi Flick chuan, "Camp Nou-a kir hian nasa takin min pui dawn a, he khelmuala khelh hi kan hma hun zel atan pawh a pawimawh," a ti a, an stadium hmingthangah chak ngeia bul ṭan a duh.
Thawhlehna mamawh
Real Madrid-in international break hmaa an match hnuhnung pahnihah hnehna an chang zo lo a, insiamṭhat an mamawh - Liverpool lakah 1-0 a an tlawm hnuin, La Liga-ah Vallecano chu 0-0 in an inhnehtawkpui ringawt.
La Liga-ah Real hian match 12 khel tawhin, vawi khat an tlawm a, vawi khat draw an nei. Result ṭha thawkhat tak ni mah se, an chetsual hun changtu Barca leh Atletico an awm ve reng avangin fimkhur a ṭul.
Madrid khaw club hian Pathianni zan dar 1:30-ah Elche chu khualmualah an lenchilh dawn a, harsatna nei loa chak mai tura beisei an ni - kar laihawlah Champions League khelh tur a awm dawn bawk.
Mahse, Alonso naute vanneihna erawh a zawna result ṭha lo an neih hnuah international break-in a zui a, fixture 'tight' viau mah se, UCL-a an tum tur hi Olympiakos an ni leh zel a, Thawhlehni zana Chelsea lenchilh zui tur Barca aiin an fixture a fuh rih zawk.
Harhtharna changtu
An match hnuhnung pahniha Real an talbuai laiin, beisei anga season bul ṭan lo Atletico Madrid-in harhtharna an chang thung a, an league match hnuhnung paliah an chak vek!
Atletico hian an league match hnuhnung paliah hian goal kua khungin, an lamah goal khat chiah a lut bawk - goal an khung theih piah lamah tlarhnung a phui tel tihna a ni a, champion an sawi ri ve leh ta.
Diego Simeone-a team hian Pathianni zan dar 11:00-ah Getafe an lenchilh dawn a, mahse, Barca leh Real ang thoa UCL khelh tur nei an nih avangin Argentine coach tan player thlan thiam a ṭul dawn.
Atletico hian league-ah result nei ṭha mah se, Champions League-a an match hnuhnung berah Arsenal chu 4-0 in an ngam lo a, Nilaini zanah Inter Milan an mikhual zui dawn - fimkhur a finthlak ang.