Pathianni zanah Milan derby

Khawvel huap pawha inkhel ngaihven hlawh ber pawl ni ṭhin, derby boruak sang leh hmuhnawm, Milan derby chu Pathianni zan dar 1:15 hian khelh a ni dawn a, Inter Milan leh AC Milan an intawng dawn.

Tun hnaia Italian football a tlakhniam deuh avangin tun hma angin derby hian ngaihven a hlawh tawk lo a ni mai thei - mahse, a boruak erawh a sosang reng a, club pahnih pawh an inhal ngai rengin an la inhal e!

Pathianni zana team pahnih intawng tur hi table-a an dinhmun avangin boruak a sang lehzual ang. Serie A match 11 khelh tawhah Inter hian hma an hruai mek a, point 24 an nei mek.

Mahse, Inter hmahruaina hi derthawng tak a ni - pahnihna AS Roma nen an point hmuh zat a inang a, AC Milan leh Napoli ten point 22 ve ve neiin, point hnih chauhin an thlau bawk!

A tawi zawnga sawi chuan vawi khat chetsualah an la inlehthal thei tihna a ni a, vawi khat chetsual zeuh hian hmahruaitu tan pawh palina velah a tlak daih theih tihna a ni ber - Serie A a ngaihnawm chho hle.

Cristian Chivu enkawl Inter hian season bul an ṭan fuh tawk lo a, an league match hmasa pathumah vawi hnih an tlawm. Mahse, a hnuah an insiamṭha vat a, an league match hnuhnung pariatah vawi sarih chakin, vawi khat chiah an tlawm.

Italian club hi Champions League-ah match li khel tawhin an chak vek bawk. Hetihrual hian club lian tia chhal tur UCL-ah an la hmachhawn lo a, Atletico Madrid, Liverpool leh Arsenal a zawna an tum chhoh dawn avangin an nihna tak tak a hriat chhoh ang!

Inter tan hian kum 36 mi keeper Yann Sommer a la rintlak reng a, match 14-a goal riat khungtu Lautaro Martínez leh match 13-a goal ruk leh assist vawi thum neitu Hakan Çalhanoğlu te pawh buaipui tham an la tling. Hliam vanga a chawlh reng hnuah Marcus Thuram a lo kir leh tawh bawk.

Kum 2022 hnua a vawi khat nan AC Milan-in Serie A nomawi chawi leh an tum a, an tum tihlawhtling tur chuan team lian an hneh zel a ṭul - an league match hnuhnung paliah vawi khat chiah an chak a, vawi thum draw an nei.

Milan-in insiam ṭhat an mamawh tih a lang a, hliam vanga an chawlh hnuah Christian Pulisic leh Adrien Rabiot te chu zanina inlan thei dinhmunah an ding.

Tlarhmaah Rafael Leão tan pawh mawhphurhna lak ngam a ṭul a, Inter an hneh theih chuan champion beiseina an nei sang leh sawt ang - coach Massimiliano Allegri hian Juventus chu Serie A-ah hian vawi nga a lo champion pui tawh a, kum 2011 khan Milan hi a champion pui tawh bawk.

Champion dan hria coach-in Milan a kaihruai a, Inter hneh a, coach ṭha a nihzia pholan leh a châk dawn. Milan derby boruak a sang leh dawn e.