Bayern tan insiamṭhat hun

Bayern Munich-in season bul an ṭan ṭha a, inelna hrang hrangah match 16 chhung an chak zawn hnuin Union Berlin nen 2-2 a an inhnehtawk avangin an record duhawm tak a tawp. Vincent Kompany hoten bul an ṭan ṭhat leh a ngai a, zanin dar 8:00-ah SC Freiburg an mikhual dawn.

Bavarians hian Allianz Arena-ah SC Freiburg lakah record an nei ṭha hle. Freiburg hian Munich khelmualah chak hmel an la hmu lo a, vawi 25 an khelh tawhah vawi 22 chak loin vawi thum an inhnehtawk.

Bayern tan striker Harry Kane a rintlak a, Bundesliga-ah goal 13 a khung tawh. England captain goal khung zat leh Freiburg team pumpui goal khung zat a intluk.

Chutihrualin hliam vangin Manuel Neuer dinhmun a chiang lo a, 'gastrointestinal virus' vangin training pawh a zawm lo. Neuer hi a inlan thei lo a nih chuan kum 21 mi Jonas Urbig-a'n mawhphurhna a la ang.