Hliamin a tihbuai PSG

Ligue 1-ah zanin dar 1:35 hian PSG-in Le Harve an mikhual dawn. Luis Enrique hote hi table hmahruaitu ni mah se tun hnaiah harsa takin an chak ṭhin a, hliamin a tibuai bawk. French champion hian Champions League-ah Tottenham Hotspur an hmachhawn dawn nen Spanish manager Enrique tan hna a tam hle.

PSG hi league match hnuhnung pathumah vawi hnih chakin vawi khat an inhnehtawk a, an chak ṭumah hian goal khat ve vein hnehna an chang. Nice lakah Goncalo Ramos-a'n injury time-ah chakna goal a khung a, Lyon lakah pawh Joao Neves-a'n injury time-ah tho chakna goal a khung.

French champion hian Nice leh Lyon inkarah hian Champions League-ah Bayern Munich 2-1 in an hneh lo zui a, European champion tan insiamṭhatna tur a tam hle. Right back ṭha mi Achraf Hakimi chu ke rek hliam vangin a chawl rei dawn a, Africa Cup of Nations pawh khel lo thei dinhmunah a ding.

Left back ṭha Nuno Mendes pawh khum hliam vangin a chawl rei dawn a, ballon d'or kawltu Ousmane Dembélé pawh a chawnah hliam tenau a neih avangin tun karah an awltir a rinawm. Hliamin a tihbuai avangin PSG manager Enrique tan ngaihtuahna senna tur a tam lehzual ang.