Champion tum lo Manchester City!

Manchester City-in Arsenal tan pressure siamsakna hun remchang nei mah se, an tlawm a, Inrinni zan inkhelah Newcastle United chu 2-1 in an ngam lo.

Magpies tan Harvey Barnes chuan goal hnih a khung a, City tan Ruben Dias chuan goal khat khung ve mah se, awmzia a nei phak lo - hun tawp thlengin goal dang a lut lo a, 2-1 in Magpies an chak.

City hian Newcastle hi hneh ngat se, point khat chauhin Arsenal an hlat ang a, nizana Tottenham Hotspur lenchilhtu Gunners tan pressure a sang zual sawt ang.

Mahse, City-in St James' Park-ah ball chang tam zawk ni chung leh, chance ngah zawk ni chungin goal khung an harsat a, tun season-ah a vawi li nan EPL-ah an tlawm ta der.

City tan goal khung ṭhang Erling Haaland-a'n goal khung a harsat a, Nick Pope chauh hmachhawn chunga a khung lohte, Jeremy Doku siamsak engmah lo maia a chantirte chu an ui vawng vawng ang.

World Cup-a Norway hruai thleng hlim Haaland hian tun season-ah club leh ram tan match 20 a khelh tawh aṭangin goal 32 a khung tling tawh - mahse, Magpies lakah erawh a nil a, tun season-a a hmachhawn tawh team-ah Tottenham Hotspur leh Aston Villa lakah a lo khung lo tawh bawk.

Kum 25 mi striker hian Premier League-ah goal 99 a khung tawh a, EPL-a goal 100 khung tling rang ber record siam thei dinhmuna a dinna chu pawhseiin a awm leh ta - mahse, he record erawh a siam tho a rinawm.

Haaland hian EPL-ah match 109 khel tawhin, goal 100 khung rang ber Alan Shearer khan match 124-ah goal 100 hi a khung tling thei. Norwegian striker beisei phak loh zanah Magpies tan Barnes a vul thung.

Kum 27 mi winger hian minute 63-naah goal hmahruai a khung a, Dias chuan minute nga hnu lawkah City tan sut mah se, minute 70-naah Barnes hian chakna goal a khung leh zui a ni - a vanneih zan ni se hattrick a siam hial ang.

Newcastle tan City hneh hi result duhawm a ni. Tun season-ah Eddie Howe-a team-ten beisei an phak lo a, City an hneh hi league match 12 an khelh tawha vawi li an chakna chiah a ni!