Chelsea-in kawng dik zawh zel

World champion Chelsea-in English champion ni leh tura team din an tumna kawngah kawng dik an zawh zel a, Inrinni zan khan Burnley chu 2-0 a hnehin, Premier League table-ah pahnihna an ni ta.

Blues tan Pedro Neto leh Enzo Fernandez ten goal hnih ve ve khungin, Burnley lamin a chhanletna tur an nei lo. London club hian point thum chiahin hmahruaitu Arsenal an thlau ta a, nizan inkhela Gunners result a zirin an inthlauhna erawh danglam leh thei a ni.

Chelsea hian Thawhlehni zanah Champions League match khel turin Barcelona an mikhual zui ang a, Catalan club an mikhual zawhah hian Premier League match khel turin Arsenal an mikhual zui leh ang!

Blues manager Enzo Maresca-a'n hei hi rilruah dah chungin, midfielder pawimawh Moisés Caicedo, Estêvão Willian leh Alejandro Garnacho te bench-ah a dah vek a, Burnley lakah harsa loa an chak avangin player pathum hi khelmuala luhtir loin hun an hmang tluan thei.

Chelsea hian a tirah chuan player ṭhate bench-a dah chu an tuar dawn em ni chu aw, tih theihin a awm hman a, mualneitu Burnley lamin bul an ṭan ṭha hle.

Burnley tan hian Jaidon Anthony chuan inkhel ṭantir lamah chance duhawm vawi hnih a nei a, mahse, a chhawr thei lo ve ve. Hetihlai hian Loum Tchaouna pawhin chance duhawm nei mah se, Blues keeper Robert Sanchez chuan ṭha zetin a dansak.

Mahse, mikhual team an hnufual rei lo. Minute 37-naah Pedro Neto a inlar a, Portuguese forward hian Jamie Gittens-a siamsak chu goal hmahruai ni turin a khung a, Chelsea-in hahdamin chawlhlawk an hman theih phah.

Maresca-a'n fixture hautak pahnih an hmabak tih hriain, second half-ah captain Reece James a luh chhunzawm tir tawh lo a, mahse, Chelsea hian inkhel erawh an thunun chhunzawm ta tho.

Second half ṭan hnu lawkah Neto chuan khung belh theihna remchang nei mah se, post a pet per a, substitute Malo Gusto, Joao Pedro, Gittens, Fernandez leh Marc Cucurella ten khung belhna remchang nei vekin, an chhawr lo.

Chelsea-in goal khung chhunzawm thei lo mah se, Burnley lamin chance mumal an neih loh avangin Blues fan-te an hlauthawng lo - Burnley tan an chance neih ṭhat ve ber chu striker Zian Flemming chuan engmah lo maiah a chantir bawk.

Hun tawp nan minute hnih chiah a awm tawh tihah Blues lam hian an khung belh ta nge nge. Minute 76-naa bench aṭanga luhtir Marc Guiu chuan Enzo Fernandez tan a siamsak a, Argentine midfielder hian chak nemnghehna goal a khung.

Chelsea hi league match thum a zawnin an chak ta a, tun season EPL-a match thum a zawna an chak hmasak ber a ni - London club hian champion an sawi ri ve leh ta a, Liverpool leh Manchester City beisei phak lo karah Arsenal elpui ber an ni lo ang tih a sawi theih ta lo.