Freiburg lakah Bayern an tho chhuak

Bayern Munich-in an mikhual SC Freiburg lakah minute 17 chhung lekah goal hnih chhuah mah se Vincent Kompany hote hian goal ngain an chhanglet a, 5-2 in an chak. Bavarians tan Michael Olise-a'n goal hnih a khung bakah Lennart Karl, Dayot Upamecano, Harry Kane leh Nicolas Jackson ten goal khat ṭheuh an khung.

Inrinni zan inkhelah Freiburg-in bul an ṭan ṭha a, minute 12-na lekah corner kick hmang ṭangkaiin Yuito Suzuki-a'n goal hmahruai a khung. Minute nga hnuah corner kick-ah bawk Freiburg-in an khung a, Johan Manzambi-a'n a tauh lut.

Freiburg-in goal hnih an khung hma avangin an la chak ngai lohna Allianz Arena-ah chak thei dinhmunah an ding a, mah se an goal hnih khung chu an khingpui Bayern chhaih kawlhtu chauh a ni. Bayern rawlthar duhawm Lennart Karl-a'n minute 22-naah si phurh sut ṭhenin, kum 17 mi chauh ni mah se box chhungah a rilru a fim hle.

First half tawp hmain Michael Olise-a'n si phurh a sut zo a, Bayern an phur thar hle. Second half ṭan aṭanga minute 10-naah Dayot Upamecano-a'n hmahruaina goal a khung a, minute 60-naah Harry Kane-a'n khung belh lehin Bayern dinhmun a ṭha ta hle.

Freiburg lakah Bayern an chungnung a, minute 78-naah Nicholas Jackson-a'n khung belhin, minute 84-naah Olise-a'n ama puala goal hnihna chu box pawn aṭangin mawi zetin a hlai lut. Bayern-in 6-1 in hnehna an chang a, Lennart Karl-a'n club record thar a siam. Kum 17 leh ni 273 mi hian goal leh assist a nei a, Bayern kawr ha tawh zinga match khata assist leh goal nei kawp thei naupang ber a ni.

Vincent Kompany hote hian November 26, Nilaini zan dar 1:30-ah Arsenal an hmachhawn dawn a, Freiburg laka chiang taka an chak avangin Emirates Stadium-ah inrintawkna an ngah sawt ang. Gunners hian nizan kha Tottenham Hotspur an hmachhawn a, result kan hre hman lo.