Pogba a rawn kir leh ta

Damdawi hman phal loh hman vanga hrem Paul Pogba a rawn kir a, Inrinni zan khan kum hnih chuang competitive match a khelh tawh loh hnuah Monaco tan a rawn inlan. Monaco erawhin result ṭha an nei lo a, Rennes lakah 4-1 in an chak lo.

Kum 32 mi Pogba hi minute 85-naah luhtir a ni a, Manchester United midfielder hluiin khelmual a rah hian Monaco hi 4-0 in an hnufual tawh a, captain Denis Zakaria hnawhchhuah vangin player 10-in an khel tawh tih hriat a ṭha. Injury time-ah Monaco-in substitute Mika Biereth hmangin si phurh sut ṭhen mah se result erawh a danglam tawh lo.

World Cup-a France champion puitu zinga mi Pogba-a'n Monaco tana a inlan hmaa a khelh hnuhnung ber chu September 3, 2023 daih tawh kha a ni a, Juventus tan khelin Empoli a hmachhawn. French midfielder hian damdawi hman phal loh a hman avangin kum li chhung hrem a ni a, mah se Court of Arbitration for Sport (CAS) in thla 18-ah an pawhtawi sak.

Kumin nipui khan Pogba-a'n Monaco a zawm a, a mittui a tla hial. Hun rei tak a inkhelh tawh loh avangin inkhel turin hun a mamawh a, ni 811 hnuah a rawn leh ta chauh. Inrinni zanah inlan rei lo mah se Pogba-a'n inelna sang khel turin theihna a nei tih a rawn lantir a, match tam zawkah a inlan chho ang.