Premier League roreltu Liverpool

Liverpool hnuai lamah Leicester City leh Manchester City ten hnehna chang ve zel mah se a chung lamah Liverpool an tawlhthluk hleihtheih loh avangin Premier League table a danglam hman meuh lo a, a chung berah Reds an awm chhunzawm zel. 

Nilaini zan khan Merseyside derby-ah Liverpool chuan 5-2 in Everton an hneh a, Divock Origi chuan goal hnih a khung. Xherdan Shaqiri, Sadio Mane leh Georginio Wijnaldum ten an khung bawk - Everton tana Richarlison leh Michael Keane goal khungin awmzia a nei lo. 

Liverpool-in champion an sawi ri a, an hmelma club-in relegation battle an sawi chhunzawm thung - Southampton-in 2-1 a Norwich City an lo hneh bawk si avangin 18-naah Everton an tla thla a, Saints hi 17-naah an chho thung. 

Leicester City chuan 2-0 in Watford an hneh ve bawk a, Liverpool an thlah fal duh bik lo. Foxes tan Jamie Vardy leh James Maddison ten goal khat ve ve an khung a, Watford-in a chhanglettu tur an nei lo. 

Jurgen Klopp-a'n December fixtures a hautak tih a hria a, a player neih dan enchhin chungin squad a rem. Tlarhnungah Alisson inhliam vanga Adrian a ding tih loh chu a danglam lo a, German coach-in a formation hman 

ṭhan 4-3-3 aiah 4-2-3-1 a hmang. 

Wijnaldum leh James Milner te defensive midfield-ah an awm a, hliam vanga a chawlh reng hnuah Shaqiri chuan Adam Lallana leh Sadio Mane te midfield-ah a rawn kawp a, Origi chu bul ṭantir a ni bawk. Captain Jordan Henderson chu bench-ah dah a ni a, Mohamed Salah leh Roberto Firmino te pawh chawlh hahdamna hun pek an ni - Everton tlarhnung tan chawlh hahdamna hun a awm lo thung!

Minute rukna lekah Origi chuan goal hmahruai a rawn khung nghal a, Shaqiri-a'n a dam chiang tawh tih pholangin minute 17-naah a rawn chhunzawm zui. 

Anfield-ah Everton-in tlawm an tum bik lo. Keane chuan minute 21-naah goal a rawn khung ve zuk a, mahse Everton tana beiseina siamsaktu ni loin Liverpool kawlh tawh sa chhaih kawlh belhna mai a ni. Nikum an intum ṭuma minute 90+6 a chakna goal khungtu Origi bawkin a rawn khung leh a, Everton tan chuan Belgian striker hi hmelma a ni. 

Reds goal hmasa pathum zinga pahnih assist tu Sadio Mane hun a her chhuak ve leh a, Senegalese forward hian innghahna tlak a ni tih pholangin minute 45-naah an goal lina a rawn khung. Everton-in Richarlison hmangin beiseina nei ve leh mah se Wijnaldum chuan hun tawp rual deuhthawin chak nemnghehna goal a rawn khung a, a tawpah 5-2 in an chak. 

Liverpool boss Jurgen Klopp chuan, "Goal ṭha tak vek a ni a, a ropui em em vek. Passing lah a mawi a, football hmuhnawm tak kan en a, nuam ka ti takzet a ni," tiin a naute khelh danah a lawm thu a sawi. Klopp hian Premier League match-ah vawi 100 hnehna a chang ta a, he record nei tur hian match 159 a mamawh thung - match 100 chak tling tura Premier League-a match mamawh tlem ber chu Jose Mourinho a ni a, Portuguese coach hian match 142 chiah a mamawh. 

German coach chuan a player thlak danglam chungchang sawiin, "Player thlak kual ka mamawh a, an hun ṭha neih a thlawnin an khawh liam lo. Dik taka sawi chuan hetianga player han siksawi hi thil nuam tak a ni a, ka naute kha inkhel turin an inpeih vek a ni," a ti. 

Liverpool-in goal nga khung mah se a aia tam zawk khung thei an ni a, an khelh ṭhat ber ṭum tia chhal tur ni lo mah se khelh ṭhat loh niah pawh goal nga an khung theih avangin an ngaihtuahawm loh.