Saitual district champion Venglai
Saitual District Inter Village Football Tournament chu nimin tlai khan khelh zawh a ni a, nomawi inchuhna inkhel hmuhnawm takah Saitual Venglai chuan Ngopa 3-0 a hnehin an champion.
Saitual Public Playground-a final khelhah Venglai tan hian - Lalbiakthanga 15', Lalrinfela 29' leh Lalremruata Sailo 41' te chuan goal khat ṭheuh an khung a, team ṭha Ngopa lamin minute 90 chhungin a chhanletna tur an nei lo.
Mizoram Football Association hriatpuinaa buatsaih inelnaah Saitual Venglai hian champion turin Ngopa, Saichal, Mimbung leh Sihfa te an hneh a, match li an khelhah goal 13 khungin anmahni lamah goal thum chauh a lut thung - goal khung an theih piah lamah tlarhnung phui an ṭhatpui.
Ngopa tan forward ṭha F. Lalnuntluanga a hmuhnawm a, mahse match hmasa pathuma hattrick siam vek thei hi Venglai lakah erawh a vannei tawk lo. Ngopa hian final kalkawngah kumin Saitual I Day Football champion Keifang chu 4-2 in sawp thei mah se inkhel pawimawhah goal an khung thei lo.
Thlirna Tawi
Saitual Venglai 3 - 0 Ngopa
SVL : Lalbiakthanga 15'; Lalrinfela 29'; Lalremruata Sailo 41'
Best Player Lalbiakthanga, Saitual Venglai
Best Keeper Lalhmachhuana, Saitual Venglai
Top Scorer F. Lalnuntluanga (9 Goals), Ngopa
Fairplay Saitual Venglai