Chelsea-in Barcelona mikhual dawn

UEFA Champions League-ah zanin dar 1:30 hian Chelsea-in Barcelona an mikhual dawn a, inkhel en châkawm bik a ni ang. Catalan club hian match li khelh tawhah point sarih hmuin 11-naah an awm a, Blues hian point sarih tho hmuin Barca hnuai chiahah an awm.

Hansi Flick hoten season ṭha ber hmang lo mah se an result erawh a chhe hran lo. La Liga-ah Barca hi pahnihna an ni a, point khatin hmahruaitu Real Madrid an pha lo. Chutihrualin kartawpah Barca hian Athletic Bilbao chu 4-0 in an sawp a, Chelsea hmachhawn turin an phur khawp ang.

London club pawhin khualmualah Burnley 2-0 in an hneh ve bawk a, Enzo Maresca hote Catalan club hmachhawn turin an inpeih. Chutihrualin Blues-in Cole Palmer-a tel loa khelh an zir rih a ṭul thung.

Thawnthu hlui

Chelsea leh Barcelona hian Champions League-ah sulhnu an nei ṭha a, an inkhelh tawhnaah pawh boruak a ṭang ṭhin hle. Team pahnih ṭantuten kum 2009 semifinal second leg an theihnghilh tawh lo ang. First leg-ah goal awm loin an inhnehtawk a, second leg-ah Michael Essien hmangin Blues-in hma an hruai. Referee Tom Henning Ovrebo-a'n Chelsea penalty beiseina vawi tam a tihthlawn sak a, hun tawp dawn hnaiah Andres Iniesta-a'n goal khungin away goal rule hmangin Spanish club an vannei ta zawk.

Mahse, kum 2012 semifinal-ah Chelsea-in phuba an la. Stamford Brige-ah Blues 1-0 in an chak a, Nou Camp-ah second leg khelin Sergio Busquets leh Andrés Iniesta te hmangin Catalan club-in goal an khung a, first half-ah John Terry hnawhchhuah a ni bawk. Ramires-a'n halftime hma chiahin away goal pawimawh London club tan a khung a, hun tawp dawn hnaiah Fernando Torres-a'n keeper bumin chak nemnghehna goal a khung.

Chelsea leh Barca inkhel a hmuhnawmṭhin a, 2005 leh 2006 round of 16-a an inkhel pawh boruak a sang ve ve. Box pawn aṭanga Ronaldinho goal mawi thlengin kum upa lam deuh chuan an mitthla thei ang.

Engtin zel?

Chelsea winger Petro Neto-a'n Burnley an hmachhawn ṭumin goal hmahruai a khung a, midfielder pawimawh Enzo Fernandes-a'n goal a khung bawk. Maresca tana chanchin lawmawm chu Clarets lakah goal an chhuah lo.

Blues hi Premier League-ah pahnihnaah an awm mek a, chutihrualin Arsenal hnuai chiaha an awm chhan erawh club dang chet chhiat vangah a ngaih theih. Hei vang tak hian tun dinhmunah Barcelona hi an buk a rit zawk.

Bilbao an hneh ṭumin Marcus Rashford a inlan thei lo a, English forward hian Chelsea a hmachhawn theih a beiseiawm. Catalan club hian tlarhmaah Rashford bakah Robert Lewandowki, Lamine Yamal leh Raphinha te an kawl a, chelh an har khawp ang.