Mega Boxing 2025-ah tawnhriat nei boxer inlan ṭan dawn

Sailo Agencies-MIZBA Mega Boxing 2025 chu R. Dengṭhuama Indoor Stadium, Mualpuiah zanin aṭangin chhunzawm a ni dawn a, tawnhriat nei boxer-te an inlan ṭan dawn. Inelna hi Zonet Rihnim, Empai leh YouTube hmangin a en theih ang. Zanin aṭang chuan inkhel en man pawh Rs 50 a ni tawh dawn.

Bout hmasa ber hi zan dar 7:30 aṭangin an ṭan dawn. North Vanlaiphai rawlthar Justin M. Lalthanpuia'n inelna vawi khat telna Ratu tlangval Dennis Vanlalsiama a hmachhawn dawn. Kum 18 mi Justin hian state level boxing-ah gold pathum a la tawh a, a khingpui tur Dennis hi kum 23 mi niin, HB and Alter Academy-a training nei a ni.

47-50 kg category-ah Sialhawk rawlthar Michael Zosangliana a inlan dawn a, kum 17 mi chauh ni mah se Lunglei Championship-ah gold a lo la tawh a, Inter District Tournament-ah silver a la tawh bawk. A khingpui tur hi Churachandpur aṭanga rawn tel Lunminhou a ni ang.

50-55 kg category-ah Rosiamliana leh Lalhriatzela te inhnek tur en a châkawm. Tuipui tlangval Rosiamliana hian gold pathum leh silver pali a la tawh a, kum 15 mi chauh a la ni chungin Guwahati Talent Hunt 2023 ah leh Inter-SAI (Delhi) 2025 inelnate a lo hmachhawn tawh. Maubawk tlangval Hriatzela erawhin tawnhriat a nei lo a, mah se harsatna nei loin tun round hi a thleng.

55-60 kg category-ah Jacob Laldintluanga leh Lalruatmawia te inhnek tawk viau turah a ngaih theih. Kum 17 mi Jacob (Darlak) hian Inter District-ah kum zawnin gold a hnek chhuak a, a khingpui tur Chhiahtlang tlangval Ruatmawia hian Serchhip District-ah gold a la tawh thung.

Joela (Hnahthial) leh Lalramdinmawia (Bawngkawn W) te pawh intum tawk viau turah a ngaih theih. Joel hian Mizoram chhungah gold pahnih leh bronze pali a hnek chhuak tawh a, kum 20 mi niin All India Inter-SAI-ah pawh gold a hnek chhuak tawh. A khingpui tur Lalramdinmawia hi kum 17 mi chauh la ni mah se U14 Sub Junior Ramhluna buatsaih ṭum khan gold a hnek chhuak.