Aizawlah AFC C Licence kalpui mek

Mizoram Football Association leh Reliance Foundation Young Champs ṭangkawpin an buatsaih Asian Football Confederation 'C' Diploma Coaching Course chu November 17, Thawhṭanni aṭang khan neih ṭan a ni a, November 28, Zirtawpni thleng a awh ang.

Tun ṭuma course instructor hi Vikash Panth a ni a, Meghalaya aṭanga rawn kal Vikash hian Aizawl-ah AIFF D Licence Course pawh a lo kalpui tawh. Asst instructor hi K Lalrindika leh R Lalruatfela te an ni a, coach pathum hi AFC A Licence vek an ni. Mission Vengthlang pa Dika hi Mizoram Sub Junior team coach a ni a, Kolasib tlangval R-a hi Aizawl FC coach a ni thung.

Co ordinator-ah VL Rinpuia, Leitan a awm a, ani hian I League, MPL, Reliance Naupang League aṭanga Aizawl DFA hnuai inelna thlengin a buaipui ṭhin. Tun ṭumah hian mi 25 an inziak lut a, coaching fee bakah senso ngai dang zawng zawng pawh Reliance-in a tum vek a ni.