Elche khelmualah Real chak zo lo

Pathianni zan La Liga inkhelah Real Madrid an chak zo lo a, Spanish top flight league-ah champion inum boruak a sang leh ta sawt - Real hian an mikhualna ramah Ecleh chu 2-2 in an inhnehtawkpui.

Mualneitu Elche hian Aleix Febas leh Álvaro Rodríguez hmangin vawi hnih ngawt hma an hruai hman a, mahse, Real-in Dean Huijsen leh Jude Bellingham hmangin si phurh an sut ve ve.

Elche centre back Víctor Chust chu hnawhchhuah ni mah se, hun pek belh a nih tawh avangin Real tan chhawrna hun a awm tawh lo a, 2-2 a inkhel tawpin, point khatah lungawi an zir.

Real-in league match 13 an khelh aṭangin point 32 an nei a, pahnihna Barcelona aiin point khat chiahin an sang tawh. Hetihlai hian Atletico Madrid chuan Domingos Duarte (own goal) hmangin Getafe an hneh a, Real leh Barca an um ve zel.

Beisei loh

Elche khelmuala inkhelah Real hi harsatna nei loa chak mai tura beisei an ni a, mahse, Xabi Alonso-a'n tlarhmaah Kylian Mbappe leh Rodrygo bul a ṭantir chungin goal an khung thei lo.

Minute 53-naah rin loh zawk Elche tan Aleix Febas chuan goal hmahruai a khung a, Real an hawihai. Alonso-a'n tlarhmaah player hriam a mamawh tih hriain Vinícius Júnior a luhtir zui a, nawr nat a tum.

Real hian si phurh chu an sut ta ngei a, mahse, Madrid khaw club tana si phurh suttu erawh tlarhma player ni loin, defender Dean Huijsen a ni a, minute 78-naah si phurh a sut a, 1-1 a ni.

Alonso nauten goal an khung hnuah harsatna nei loa khung belh mai tura beisei an ni a, mahse, beisei loh angin thil a kal zui - minute 84-naah Alvaro Rodriguez chuan Elche hmahruai nawnna goal a khung!

A harsa

Hun tawp nan minute ruk chiah a awm tawh tihah Real-in si an phur nawn a, thawh leh a harsa tawh dawn tih chu thil chiang a ni. Mahse, Alonso nauten an tlawm chuan Barca nen an point hmuh zat a inang dawn tih an hria.

Minute 87-na a ni a, Jude Bellingham a inlar. English midfielder hian Mbappe siamsak chu si phurh sutna goal ni turin a khung a, goal dang a luh tawh loh avangin 2-2 in inkhel a tawp - Mbappe laka a foul avangin Chust hnawhchhuah ni mah se, hun pek belh minute rukna a nih tawh avangin awmzia a nei phak lo.

Elche hian March 1978 hnua Real hnehna chance an nei a, mahse, Rafa Mir leh Andre da Silva ten uiawm takin an hun ṭha neih an chhawr lo - Silva hi Real hian Liverpool forward Diogo Jota unaupa, car accident-a thi Andre Silva nen an hriat pawlh!

Diogo te unau hriatrengna an phochhuahah Elche forward thlalak zawk hi an lo hmang tel a, Pathianni zan inkhelh hmain Real hian ngaihdam dilna an ti chhuak a ni.