MMA State Championship neih zawh a ni ta

Zo Fight Promotions 9th Mizoram State Mixed Martial Arts Championship, 2025 chu November 21, Zirtawpni khan a hmawr bawk a ni ta a, SPES Martial Arts Academy, Dawrpui chu gold 16 lain team champion an ni.

November 17 aṭang khan inelna hi neih ṭan niin, MMA India National Federation hriatpuinain amateur fight night, Mizoram Fighting Championship (MFC) neih zui a ni bawk.

State Championship-a best fighter chu Lalnunsanga, Chawnpui, SPES academy niin, MFC fighter of the night atan SPES academy fighter Lalramsangliana, Bawngkawn South chu thlan a ni bawk.

Mizoram State Mixed Martial Arts Association (MISMA) huaihawta neih State Championship-ah hian district pariat aṭangin fighter 78 an tel a, affiliated club bakah individual entry leh non-affiliated club eng emaw zat an tel bawk a ni.

Tun inelnaah hian Olympic Council of Asia-in youth rules (10-17 years inkar tan) a pawm zulzuiin naupang lam tan fight ruahman tel a ni a, kum 10 hnuai lam exhibition bout pahnih a awm bawk.

MFC bikah hian bout sarih (7) awmin, Mizo fighter ṭhate an intum bakah, Assam, Manipur leh Tripura aṭangin fighter chah luh an ni a, Mizo fighter-te nen an inhmachhawn a ni.

MISMA president T. Lalrinpuia chuan, "Mizo fighter-te talent a sang tawh a, MMA-a kawng hnih, amateur line - Asian Games thleng khelh theih emaw professional line-ah emaw fighter-te chu promote chho zel turin hma lak kan tum a ni," a ti.

Hetihlai hian MISMA general secretary Samuel Lalrozama chuan, "Fighter-te national khelh nan leh fight night siam nan MISMA hruaitute an che chhuak mai ṭhin," a ti a, an event neih zawh tak pahnih main sponsor Zo Fight Promotions CEO chu MISMA senior vice president Dr. Jeremy L Pautu a nih thu a sawi.

Dr. Jeremy bakah hian Netsurf, RTZ Enterprise, Hotel Platinum, Shop XIX leh RK Digitals ten fight hi an sponsor a, anni pawh hi MISMA hruaitute ta vek a nih thu Lalrozama chuan a sawi a, kum thar lamah pawh amateur leh professional platform buatsaih chhoh an tum thu a sawi bawk.