Vawiinah Mizoram Vs Himachal Pradesh

Dr. Talimeren Ao Junior Girls’ National Football Championship 2025-26-ah Mizoramin Pathianni zan khan an match hmasa berah Maharashtra a hmachhawn a, 3-3 in an inhnehtawk. Zanin dar 6:30 hian Chümoukedima Football Stadium, Dimapur-ah Himachal Pradesh an hmachhawn leh ang.

Group match hmasa berah hian Maharashtra-in ṭum hnih hma hruai mah se Mizoram an tho chhuak ve vek. Kirti Jayendra Patil enkawl Maharashtra hian minute 30 chhung lekin Shivika Shetty leh Aarnaa Hardik Sindhav hmangin an khung hmasa a, first half injury time-ah Jh Lalnunpuii hmangin Mizoramin an sut ṭhen.

Second half-ah Vanlalmawipuii hmangin minute 72-naah Mizoramin si phurh an sut zo a, hun tawp thlengin boruak a ṭang. Aanshi Khaana-i'n hun pek belh minute linaah a khung a, Maharashtra-in chakna goal turah ngai mah se Loisy Lalpekkimi'n minute ruknaah a sut a, 3-3 in inkhel a tawp.

Vawiina Mizoram hmachhawn tur Himachal Pradesh hian an match hmasa berah Madhya Pradesh 5-0 ngawtin an hneh lo a, an group-a nem berah an ngaih theih. Coach R. Lalhminghlua enkawl Mizoram tan pawh Himachal laka chiang taka chak a ṭul ang. Madhya Pradesh leh Maharashtra te hi vawiin chawhnu dar 2:30-ah an inhmachhawn bawk ang.