Insiamṭhat mamawh City

Manchester City chuan zanin dar 1:30 hian Etihad Stadium-ah Bayer Leverkusen an mikhual dawn. Pep Guardiola hote hi season liam taa nomawi an chawi loh aṭangin an la che fuh hlei thei lo a, kartawp Premier League-ah pawh Newcastle United lakah 2-1 in an tlawm.

Champions League-ah erawh City an la tlawm lo a, match li khelhah vawi thum chakin vawi khat chiah an chak lo. An khingpui tur Bayer Leverkusen erawh vawi li aṭangin point nga chiah an la hmu a, City hmuh chanve chauh an la hmu tihna a ni.

Man City tan Premier League lamah Arsenal nena an inkar tihzim a pawimawh a, nuam sa taka kartawpa Leeds United an hmachhawn theih nan German club hi an hneh a pawimawh. Erling Haaland-a'n tun season inelna hrang hrangah City tan goal 19 khung tawh mah se Magpies lakah goal a khung lo a, Leverkusen lakah goal khung a tum ang.