South Africa dinhmun a ṭha

South Africa leh India ten Barsapara Stadium, Guwahati-ah Test match vawi hnihna an khel mek a, nimin lamah Men in Blue an chet ṭhat loh avangin mikhual Proteas dinhmun a ṭha ta zawk.

Temba Bavuma captain-na hnuaia khel South Africa hian first innings-ah 489 runs an siam a, India lam chhanletna chu 201 runs chauh a ni. Nimin khan ni thumna khelh niin India batter-ten ni khat an daih lo.

Opener Yashavi Jaiswal-a'n 58 runs siamin a vaw chhuak hnem ber a, Washington Sundar-a'n 48 runs siam ve bawkin batter dangin 25 runs an siam pha lo. Nimin khan South Africa an bat hman a, 26 runs siam tawhin wicket an la hloh lo bawk.