Atletico de Kolkata-in semifinal an lut
Indian Super League khelh mekah Thawhlehni zan khan Atletico de Kolkata chuan goal khat ve ve khungin Kerala Blasters an inhnehtawkpui a, season bul ṭan chhe deuh mah se an insiamṭhat leh thuai avangin semifinal an lut chiang ta.
Kerala Blasters tan khel ṭha thei tak CK Vineeth chuan inkhel ṭan aṭanga minute kuana lekah goal hmahruai khung mah se ATK-in a chhanletna nei turin hun an duh rei lo a, Kerala Blasters player hlui Stephen Pearson chuan goal an chhuah aṭanga minute 10 hnuah an si phurh sutna goal hi a khung a ni.
Thawhlehni zan inkhelah hian Lalrindika Ralte chuan bench lamah hun a hmang tluan a, I League lamah pawh East Bengal tana a khelhpui Khawzawl tlangval Robert Lalthlamuana chuan inkhel bul a ṭan thung.
Indian Super League-ah Mumbai City, Delhi Dynamos leh Atletico de Kolkata-te hi semifinal lut chiang tawh an ni a, nizan NorthEast United leh Delhi Dynamos inkhel result kan hre hman lo a, Highlanders result a zirin Blasters dinhmun a chiang ang.
Molina a hlim
Atletico de Kolkata coach Jose Molina chuan, "He inel-na ṭan tira kan tum ber kha semi-final a nih avangin zaninah a thiam pali zinga kan tel thei hi ka lawm takzet a ni. Point khat hmuhin semifinal kan lut tih hre mah ila hnehna chan ngei tumin zaninah khan kan khel a, tunah kan dinhmun chiang mah se Pune City kan la hmachhawn turah pawh hnehna chan ngei tum thoin kan khel ang," tiin a sawi a, a player chhawr ṭhan lohte tan inkhelhna hun a siamsak tur thu a sawi bawk.
Semifinal hmaa match khat chiah khelh tur nei tawk ATK hian an khelmuala match ruk an khelh tawhah vawi li an khingpui inhnehtawkpuiin vawi khat chiah an chak a, vawi khat an tlawm thung. Villarreal coach hlui chuan hemi chungchang hi sawilang nghalin, "Chetsual chang kan nei ṭhin a, holam taka goal chhuah pawh kan nei ṭhin. Salt Lake Stadium-ah kan home match kan khel thei lo a, duh angin min ṭawiawmtu fans kan nei tawk lo. Hnehna chang tur chuan fan-te ṭawiawmna a pawimawh em em a ni," tiin a sawi.
Mimal Lawmman
Emerging Player of the Match Abinash Ruidas, Atletico de Kolkata
Hero of the Match Stephen Pearson, Atletico de Kolkata
Zanin Inkhel Tur
FC Goa 07:00 pm Chennaiyin FC
Team Dinhmun
Team Pld W D L GF GA GD Pts
Mumbai City 13 6 4 3 16 8 8 22
Delhi Dynamos 12 5 5 2 26 15 11 20
Atlético de Ko… 13 4 7 2 16 14 2 19
Kerala Blasters 13 5 4 4 12 15 -3 19
NorthEast United 12 4 3 5 12 12 0 15
Pune City 13 4 3 6 13 16 -3 15
Chennaiyin 13 3 6 4 16 20 -4 15
Goa 13 3 2 8 10 21 -11 11
Note: ATK leh Kerala Blasters hi an point hmuh zat in ang mah se head to head-ah ATK an ṭhat zawk avangin Kolkata club hi an tlang a ni.