Woods hian min khum thei ang - Nicklaus

American golfer Jack Nicklaus chuan major championship no-mawi 18 zet a chawi chu Tiger Woods-a'n a rawn khum theih a rin thu a sawi chhuak.

Major title 14 la tawh Tiger Woods hi a hnungzâng na vangin kum khat leh thla li chhung a inkhel thei lo tawh a, a champion hnuhnung ber chu 2008 US Open daih tawh kha a ni.

Kum 76-a upa Nicklaus chuan, "Woods hi ka be fo a, a hriselna hi a ṭha chhunzawm thei a nih chuan kum 10 lo awm leh tur thleng hian ṭha takin a la khel thei ang. Ani hi chu theihna nei sang bik a ni a, kei chuan a lakah hian beiseina ka nei sang hle," tiin a sawi.

Kum 40-a upa Woods hian zaipui vawi thum ngawt a tawrh hnuah tun hnaiah a dam chho leh mek a, chawlh a la tum loh bakah tun season mai niloin beiseina nen season thar a thlir mek.

Nicklaus chuan sawi chhun-zawmin, "Golf hi mi pakhatin a thunun theih a ni lo a, mi hran hranin hlawhtlinna kan inchan chhawk ṭhin. Ka hmuh dan chuan Tiger hi a la beidawng lo a, ka nomawi chawizat hi chu a chawi theih ka ring," tiin a sawi.