Andy Murray beisei sangtu Rusedski

Britain tennis hranghlui Greg Rusedski chuan Andy Murray-a'n season tharah Grand Slam nomawi tam zawk a chawi theih a beisei thu a sawi chhuak.

World number 1 Murray hian tennis a khelh tawh china a kum ṭha ber a hmang liam mek a, a naupan laia a lo suangtuah ṭhin ATP ranking-a number 1 nihna chu Novak Djokovic lak aṭangin a chhuhsak. Heng bakah hian Wimbledon leh Rio Olympic champion a nihna te chu kumina hlawhtlinna tam tak zinga langsar an ni.

Rusedski chuan, "Ka hmuh dan chuan season thar lo awm tur hi Andy tan chuan fiahna tak tak a ni dawn a, engtianga tam nge major title a lak theih tih kan hmu dawn. Tuna a khelh dan ka thlir chuan nomawi tam zawk a chawi ngei ka beisei a, a elpui leh a hneh theih ngai loh lakah hnehna a chan theih tawh miau avangin a tan thil harsa a awm tawh loah ka ngai," tiin Grand Slam vawi thum champion tawh Murray a dahsang thiam hle.

Season thara Grand Slam tour-nament hmasa ber Australian Open khelh hmain kar sarih chiah a awm leh tawh a, he inelnaah hian Murray hian final vawi nga a lut tawh a- ala champion lo thung. Grand Slam pali zinga final a luh hnem berna hmun Melbourne-a champion hi Murray a tan chuan season thara a tum hmasa ber a ni ang.