Boateng-a'n club training a zawm

Tihrawl na vanga inkhel thei lo mek Bayern Munich defender Jerome Boateng chuan Thawhlehni khan club training a zawm leh tawh a, Zirtawpni zana Mainz nen Bundesliga match an khelh turah chuan inlan thei tura beisei a ni.

Germany international Boateng hi Champions League group match-a Rostov an hneh loh
ṭumin a inhliam a, kar-tawp league match-a Bayer Leverkusen an hnehna inkhelah a inlan thei lo.

German champion Bayern hian tun season kal mekah tluk loh an nei - kaithar RB Leipzig hnuaiah an awm mek. Italian manager Carlo Ancelotti naute hian match 12 khelh tawh aṭanga point 27 hmuin pahnihna an ni a, hmahruaitu Leipzing an phak lohna chu point thum a ni mek.

Tun hnaiah Bayern hi hliam vangin an buai a, tunah erawh chanchin lawmawm lam an nei ve leh ta. Striker rinrawl Robert Lewandowski chuan harsatna nei loin training a zawm leh tawh a, Javi Martinez pawh a lo kir hnai tawh. Hetihlai hian veteran midfielder Xabi Alonso erawh inkhel turin a la inpeih lo thung.