Didika tel lohna EB chak zo lo

East Bengal-in captain Lalrindika Ralte tel loin tun season-a an I league match hmasa berah hnehna an chang zo lo a, an mikhual Real Kashmir nen 1-1 in an inhnehtawk. 

Didika hi a khup na vangin thla khat zet chu inkhel thei loin a chawl tawh. Lunglei tlangval chuan, "December 15-ah doctor ka hmu leh ang a, December 22 Kolkata derby-a ka inlan hman loh chuan nakkum nghah a ngai ang," tiin Vanglaini a hrilh.

Real Kashmir-in Didika tel lohna EB an zuam a, Ivorian striker Gnohere Krizo chuan minute 33-naah goal hmahruai an khung. Kolkata club-in nawr zui mah se Ivory Coast Under 20 international hlui goal khung hi an sut lawk thei lo. 

Minute 77-naah East Bengal vanneihna a her chhuak a, Marcos Jimenez chuan si phurh a sut. Spanish third disvision club Atletico Baleares aṭanga East Bengal pantuin I League-a match a khelh hmasak berah goal a khung. 

Kolkata club tan Lalthuammawia Ralte chuan inkhel bul a ṭan a, Brandon VL Remdika leh PC Rohlupuia te chuan bench lamah hun an hmang tluan thung.