Keane-a'n chawlh a la tum lo

Kum 36-a upa Robbie Keane chuan inkhelh chawlhsan mai a la tum lo a, a kum tam deuh tawh mah se chona thar hma-chhawn tura a la inpeih thu a sawi.

Republic of Ireland international hlui Keane hi MLS club LA Galaxy tan season nga zet a khelh hnuah US-ah cham chhunzawm a tum tawh lo a, tunah hian China, Australia, Qatar leh Dubai aṭangin ngaihventu a la nei.

Keane chuan, "LA Galaxy tan hun nuam leh hlim awm ka tawng a, ka theihnghilh tawh lo ang. He hmuna ka hun tawn nuam tak ang hi ka chawlh hma ngeiin club dang tan tawn leh ka duh," tiin a sawi.

Liverpool leh Totten-ham Hotspur tan pawha lo khel tawh Keane hian ram tan match 146 a khelh aṭangin goal 68 a khung a, kumin August 24 khan ram tana inkhelh a chawlhsan thu a lo puang tawh.