Ibra hmunruak a zau - Emery

Paris Saint-Germain boss Unai Emery chuan striker kal chuak ta Zlatan Ibrahimovic hmunruak a zau thu leh a hnawhkhat tura an la inzir mek thu a sawi.

Sweden captain hlui Ibra hian season hmasa khan PSG tan inelna hrang hrangah match 51 khelin goal 50 a khung a, a club hi a zawna a season hnih nan champion nomawi pali a chawipui. French club lam hian chelh duh mah se European league lian hrang hranga lo hlawhtling tawh Ibra hian contract thar ziah aiin Jose Mourinho hnuaia khel turin Manchester United a zawm.

Champions League nomawi duh vanga an lakluh Emery-a'n June thla khan Laurent Blanc thlakin PSG a enkawl ṭan a, a tir lamah beisei a phak lo. Tun hnaia an legaue match hnuhnung pasarihah erawh vawi ruk hnehna changin hmahruaitu Monaco an phak lohna chu point khat chiah a ni tawh.

Sevilla boss hlui Emery chuan, "Paris-a ka rawn kalh tirh khan mi hrang hrangin Zlatan Ibrahimovic chanchin hi min hrilh nasa hle a, ani hi he club tana khel tawh player zinga a ṭha berte zinga mi a nih avangin an sawi nasa hi a mak hran lo. He club-a a hmun ruak hi a zau em em a, tunah pawh hian a hmun awl hnawhkhat tur hian kan la inzir mek a ni," tiin a sawi.

PSG tana goal khung hnem ber Ibrahimovic a awm loh takah chuan Edinson Cavani lakah mawhphurhna a sang chho hle. Uruguay international hian tun dinhmunah chuan a mawh-phurh-na a hlen rih hle, tun season inel-na hrang hrangah match 17 a khelh aṭangin goal 18 a khung tawh - heng zinga goal hnih chu kartawp league match-a Lyon 2-1 a an hnehna inkhelah a ni.

Spanish manager chuan, "Ca-va-ni hian inrintawkna a nei a nih phawt chuan goal khung kawngah harsatna a nei ngai lo. Club hian vawilehkhatah nasa takin hma a sawn duai duai thei lo a, kei chuan player-te nen zawi muanga hma kan sawn theih nan hna ka thawk. Club thuneitu lam pawhin transfer hunah tih tur an nei ve bawk," a ti. Europa League champion nomawi vawi thum chawi tawh hian a player neih sa a duhkhawp lo tih a chiang.