BVT sang zel dang turin Dampuia Bethlehem Vengthlang Vs Chanmari West

Laldampuia hoin Chanmari West-in Mizoram Premier League final kawng an zawh dawn nge, Lalbiaksanga Colney nauten West Warrior kawng an dal dawn?

Bethlehem Vengthlang mipui Lam-muala chai turin an inpeih a, an khing-pui tur Chanmari West mipui erawh tun dinhmuna Lammual neitu an ni.

Zanin dar 7:00 hian league-a pakhatna BVT leh palina Chanmari West an inkhel dawn a, Aizawl veng lian pahnih bakah tualchhung football ngainatuten Lammual an pan ang. Ṭhutna ṭha leh lirthei dahna ṭha chang duh tan kal hma a finthlak ang a, semifinal en man hi Rs 50 chauh a ni.

Minute 180

MPL semifinal hi minute 180 khelh tur a ni a, zanin hian minute 90 khelh phawt a ni ang a, December 8 zanah minute 90 dang an khel leh ang.

Away goal rule a awm dawn lo a, minute 180 khelh zawha chak zawk an awm lo a nih chuan penalty shootout hmanga chak zawk zawn tur a ni. Extra time a awm hran tawh lo.

BVT 2-0 West Warrior

MPL5-ah West Warrior-in vawi hnih inkhelha an hneh loh ve ve awm chhun chu Lalbiaksanga Colney enkawl Bethlehem Vengthlang an ni.

Chanmari West coach HC Zarzoliana hiaan league match-a an inkhelh hmain chak tuma an khelh tur thu a sawi lawk ve ve a. Hei chauh hi ni loin, "BVT ai hian kan ṭha zawkah ka inngai," tiin a indah san zawk thu Zara hian a lo sawi tawh - an chak lo ve ve!

Semifinal thlirin West Warrior boss Zara chuan, "Pakhatna ni thei an ni a, zuam ngawt chi chu an ni lo. Semifinal-a tlak hrehawm zia ka hria a, first leg-ah chak tumin kan khel phawt ang," tiin goal khung tam zawk nih a duh thu a sawi a, an intawn hmasak ṭum ang thoin a hlau lo tih a lang bawk.

MPL season khatnaah BS-a Colney-in a club enkawl BVT semifinal a thlenpui nghal a, season ṭan tirh aṭangin chak a duh thu a la sawi char char a, MPL5-a chak hnem ber an ni. BVT boss hian tun season-a West Warrior an hmachhawn hmasak ber ṭumin, "Point thum hmuh theihna tur an ni," tiin an team chu ṭha zawka a ngaih thu a sawi tawh bawk.

BVT boss BS-a chuan, "Semi final first leg leh second leg-ah chak kan duh. Chak loh chuan nghawng ṭha lo tak a nei a, hei vang hian ka naute hian chak duhna thinlung nei se ka duh a ni," tiin Vanglaini palai a hrilh.

Chanmari West boss Zara hian season liam ta khan Chanmari FC enkawlin semifinal-ah BVT hi a hneh tawh a, amaherawhchu MPL hmasa bera Dinthar champion puitu coach hian BS-a enkawl BVT hi vawi hnih a tum tawh - a hneh lo ve ve.

An sawi Dampuia

Kawtethawveng tlangval Lal-dam-puia hi BVT hlauh tur chu a ni a, goal 10 a thun bakah man of the match-ah vawi nga lai thlan a nih tawh avangin ven bik a ngai.

BVT boss BS-a chuan, "Chanmari West ṭhatna chu an wing hi an ni a, kan dang chat thei a nih chuan kan chak ang. Dampuia leh Danmawia-te hi an ball lak dan ka zir chiang tawh a, ka naute pawh a dan dân tur ka hrilh a, hei hi training-a kan tih ber pakhat a ni," tiin Vanglaini palai a hrilh.

West Warrior coach Zara chuan chhang letin, "Eng ang pawhin ven tum se kan khelh dan kan thlak dawn lo. Dampuia leh Danmawia ten an hna ngai an chelh leh ang," tiin BVT game plan vanga an buai loh thu a sawi.

Chanmari West hi Dampuia chauh a ni lo - MPL1 best player R. Laldan-mawia an kawl tel a, goal thun lo zawkah ṭang ṭhin mah se player hlauhawm a ni.

Midfielder zingah Reuben Zosangpuia hi tawnriat nei ṭha a ni a, game boruak sangah a che
ṭha ṭhin - Lalbiakhlua an nei tel bawk a, ani hi veng-veng inkhela Armed Veng lama BVT boss BS-a hnuaia sei lian a ni.

Tu nge nêk sâwr pâwr dawn?

Bethlehem Vengthlang hla pui chu 'A ṭhang zel dawn, a ṭhang zel dawn - BVT FC. A sang zel dawn, a sang zel dawn - BVT FC' tih a ni a, an sang zel. Champhaiah BVT-in hnehna chang lo mah se hla thar pakhat an rawn nei haw a, semifinal bik thlira an hla tur chu 'Company sumtual, a zim laiah Chanmari West kan nek sawr pawr e' tih a ni ang.

Amaherawhchu Chanmari West FC-in MPL kaithar Chhinga Veng semifinal kawng dang chatin an veng mipuiin, "Chanmari West - Nuam, nuam, nuam" tiin an au el. Zaninah hian Bethlehem Vengthlang mipui tih el nan West Warrior ṭantuten 'Bethlehem Vengthlang kan nek sawr pawr e' tia zai rual an châk khawp ang.

Ngaihnawm

• BVT keeper Malsawmdawngzela'n match 11-ah clean sheet vawi sarih neiin goal chhuah loa match hmang hnem ber a ni.

• BVT-in league match hnuhnung ber khelh hmain Zothanpuia an lalut a, Bethlehem tlangval Thangpuia hi Mizoramin Santosh Trophy an champion-na kawnga player pawimawh a nih bakah MPL2 best defender a ni bawk. Zanin pawh hian a vawi hnih nan inkhel bul a ṭan ngei a rinawm.

• BVT-in Champhaia Chanmari FC an hneh loh ṭumin substitute panga chiah an nei a, heng zingah hian keeper pahnih leh inhliam Laldingngheta an tel. Hemi hnu hian squad tihchhah nan player an ziah belh a; Shillong Lajong captain hlui Samsong Ramengmawia, MPL1-a Dinthar champion puitu Lalnunmawia leh Zo United player pawimawh Laldinliana Varte te chu player langsar an ni. Mawitea hian a club thar tan goal thum a khung tawh.

• BVT tana thu lawmawm chu an veng tlangval Dingngheta'n in­hliam vanga match riat a khelh loh hnuin league round hnuhnung bera Zo United an hneh ṭumin sub­stitute aṭangin a inlan leh tawh.

• Chanmari West tana goal khung tam ber Laldampuia'n goal 10 a khung. Danmawia'n goal li khungin West Warrior captain hi a dawr a, BVT tana goal khung tam ber Lalrammuanpuia (Apuia) nen an khung zat a inang.

• West Warrior defender Toky Zomuanpuia leh BVT defender H. Lalhlimpuia ten minute zawng zawng an la khel kim vek.

• West Warrior keeper Lalruatpuia'n match 10-ah inkhel bul ṭanin clean sheet vawi li a nei a, Chhinga Veng an hneh ṭuma H. Lalmuankima goal khung tur a dan chu save ropui bik tiha sawi theih a ni.

• West Warrior midfielder Reuben Zosangpuia'n match hnuhnung berah rin a hlawh ṭan chiah a, MPL2 best midfielder hian player ṭha bik a ni tih a lantir avangin semifinal-ah a pawh hmun pawimawh a chang ang.

• Chanmari West forward Rameng­mawia chu red card hmuh vangin a khel thei dawn lo a, inkhel bul
ṭan turin H. Lallianzama a inpeih tawh avangin buaina an neih phah lo ang.

Mipui Ṭhutna

Bethlehem VT - K. Kawla Stand leh S. Malsawmtluanga Stand

Chanmari West - Zomuanthanga Stand leh Zohminga Zote Stand

Neutral Supporter - Tlang

Inkhel en man - Rs 50/-