Andres Iniesta a lo kir hnai

Barcelona manager Luis Enri-que chuan a playmaker Andres Iniesta chu khelmual chhungah a inlan thei dawn hnai tawh tih a sawi. Spanish manager hian a cap-tain hi kartawpa El Clasico an khelh hunah chhawr theih a inbeisei.

Spain international hi October 22-a Valencia 3-2 a an hneh ṭumin Enzo Perez nen an intihpalhna lamah a khup a hliam a, hemi hnuah a la inkhel leh lo. Iniesta hi kar ruk aṭanga kar riat chhung chawl tura tih ni mah se beisei aia hmain a lo kir thei dawn niin a lang.

Enrique chuan, "Kan zingah training a nei tawh a, ka hmuh dan chuan a ṭha tawh hle. Kartawpa El Clasico kan khelh huna a inlan dawn leh dawn loh sawi chian theih a la ni lo nachungin kei chuan beiseina ka nei sang hle," tiin a sawi.

La Liga champion Barcelona hian tun season-ah beisei an phak rih lo a, match 13 khelh tawh
aṭangin hmahruaitu Real Madrid chu point rukin an phak lo mek. Catalan club hian Inrinni zanah Real Madrid an mikhual dawn a, hnehna an chang thei a nih chuan an inkar tih zimna hun ṭha a ni ang.