Chelsea dinhmun a ṭha zawk - Toure

Manchester City-in Decem-ber 3, Inrinni zan dar 6:00 hian Etihad Stadium-ah Chelsea an mikhual dawn.

Pep Guardiola nen an inhmuh-thiam hnua hmun pawimawh chang chho mek Yaya Toure chuan an mikhual tur Blues dinhmmun a ṭhat zawk thu a sawi chhuak.

Ivorian midfielder Toure chuan, "Inrinnia Chelsea nena kan inkhel tur hi a harsa dawn. Chelsea hian Europe-a football inelna lianah an tel ve loha an dinhmun a ṭha zawk. Kar khata vawi hnih khelh hi a awlsam lo," tiin Champions League an khelh avanga an dinhmun a chhiat zawk thu a sawi.

City hian Chelsea nen an in-khelh aṭanga ni thumnaah Champions League-ah Celtic an hmachhawn dawn. Premier League bik thlira Pep-a hote vanneihna erawh EFL Cup Last 16-ah Manchester United an hneh lo a, Antonio Conte hote hmachhawn turin inpuahchahna hun tam zawk an neih phah.

Kum 33-a upa Toure chuan champion tura rinkai zawi zuiin, "Ka ngaihdan tlang taka sawi chuan keini bakah Chelsea, Liverpool, Arsenal, Tottenham leh Manchester United te hi champion thei vek kan ni," tiin Jose Mourinho hote chu tun hnaiah result ṭha nei lo mah se nomawi chawi thei tur zingah a la chhiar tel.

Manchester City hian match 13 khelh tawh aṭangin point 30 an hlawh chhuak a, Chelsea-in Premier League hmahruaitu ni turin point 31 an hmu tawh thung.