PSG an sang zual zel

Kylian Mbappe leh Neymar te goal hmangin Paris St-Germain chuan Nantes 2-0 in an hneh a, French champion hian Ligue 1 match 15 khelh tawh chinah point 36 hmuin hmahruaitu an nih chhunzawm zel.

Nilaini zan French Ligue 1 inkhel dangah AS Monaco chu Toulouse mualah 2-1 in an tlawm. 2016-17 season champion Monaco hi kuminah an che fuh hleithei lo, point 21 chauh la neiin 13-na dinhmun an luah mek.

Paris khawpuia inkhelah hun chanve hma lamin goal a lut lo, second half-ah mual dinglam sir aṭanga Angel di Maria cross chu Mbappe-a'n tawih zetin a kheng lut.

Hun tawp hma minute nga chauh a awm tawh tihah Inter Milan aṭanga loan hmanga an hawh striker Mauro Icardi chuan penalty a hlawh chhuak a, footballer manto ber Neymar chuan chak nemngheh nan a chhuih lut leh bawk.

Barcelona forward hlui Neymar hi Paris club a zawm hnuah hliam vangin a buai fo, tun season-ah pawh a inlan mumal lo. Goal nga a khungna chauh a ni a, October 5 hnu lama a goal neih leh hmasa ber a ni hial. Thomas Tuchel-a naute hian anmahni aia match khata khel hnem Marseille aiin point ngain hma an hruai fal leh tawh a, nomawi an kawl lai humhim thei turin kawng dik an zawh mek zel.

PSG manager Tuchel chuan, "Hun rei tak hnuah Neymar leh Mbappe ten inkhel bul an ṭan dun leh thei tawh a, tun hma lama an inkawp rem tawhna ang kha chuan a dik nghal thlap thei lo a ni mai thei, mahse theihna nei sang an nih avangin an thiamna chu thup theih a ni chuang lo.

"An pahnihin goal an khung a, player dang tan an ṭangkai em em bawk. Football chu team game a ni a, player tin an pawimawh vek, chutihrualin theihna nei sang bik chungah chuan mawhphurhna pawh a sang deuh bik ṭhin," tiin a sawi.

PSG hi kar hmasa khan AS Monaco nen an inkhelh tur chu ruah sur nasa lutuk vangin a hun sawn a ni. French Football League (LFP) chuan Nilaini khan an inkhelh leh hun tur hi an ti chiang a, January 15 hian Monaco khelmualah an intawng ang.