England manager thar Southgate

Football Association chuan England manager thar turin Gareth Southgate an lalut a, match li chhung England kaihruai tura an lo ruat lailawk tawh manager hi kum li chhung atan contract an ziahpui.

Kum 46-a upa manager hian thamna sum vanga Sam Allardyce ban a nih hnuah Eng-land Under 21 coach ni-chungin England team hi a en-kawl lailawk zet a, World Cup qualifier-ah Malta leh Sco-tland hnehin Slovenia an in-hneh-tawkpui a, friendly match-ah Spain nen an inhnehtawk bawk.

Southgate hian England Under 21 a enkawl hmain tawn-hriat a la nei tam lo a, Premier League club Middlesbrough chu kum thum chhung enkawlin division hniam lamah a tlak thlak pui.

Football Association chief executive Martin Glenn chuan, "Gareth-a kalphung hi FA thil tum nen a inrem zaih a ni. Football tactician ropui tak a ni a, hruaitu ṭha tak a ni bawk. Chu zawng aia min hnehtu chu hnehna chan duh mi a nihna hi a ni a, he hna thawk tur hian chu chu a tawk em em a ni," a ti.

Kum khata pound makta-duai 2 hlawh tur anga an sawi Southgate hian March 22 khian England manager nghet a nih hnua a hna hmasa ber a thawk dawn a, Dortmund-ah Germany nen friendly match an khel ang.

Southgate-a inchhuang

Tawnhriat nei tam lo mah se FA-in Southgate an ringtawk a, English manager chuan, "England manager ni tura rawih ka ni hi ka inchhuang takzet a, he hnain a ken tel pawh chiang takin ka hria a, tuna ka duh ber chu ka hnathawh turte ṭha taka thawh hi a ni," a ti.

Southgate chuan sawi chhun-zawmin, "He ram hnen-ah hian nakin thlenga an inchhuanna tur thil pek let ka duh a, he team
ṭhang lai leh inkhel hmuhnawm tak chhawpchhuah hi ka duh chu a ni," tiin a sawi a, player a nih laia England tana vawi 57 inlan thei defender lakah English mipui beiseina a sang dawn.

Euro nomawi beiseitu

Euro 2020 chu Europe-a ram hrang 13-ah khelh a ni dawn a, England chhuan em em Wembley Stadium-ah semifinal leh final khelh a ni ang. Southgate chuan a thil tum ber chu Euro 2020-a England champion pui a nih thu a sawi.

England hian Euro 1996-ah khan champion zui ta Germany chu semifinal-ah an hneh lo a, hun pangngaia 1-1 a an inhnehtawk hnuin penalty hmanga chak zawk zawn a ni. A hunlaia Aston Villa defender Southgate-a'n England tan penalty a chhuih lut thei lo a, an beisei nomawi thlauhin 6-5 in an tlawm.

Kum 46-a upa manager chuan, "Kum 1996 khan player niin Euro nomawi chu ka lo hnaih em em tawh a, kha record kha thai chhiata nomawi chawi ka duh a ni. Tuna ka player te kum zat, an puitlin chhoh dan tur nena ngaihtuahin chu chu kan tih theih ka ring a ni," tiin a inringtawk hle.

Sulhnu ropui lo

Southgate-a'n England manager lailawk dinhmun a luah chhungin vawi li inkhelah tlawm hmel hmu lo mah se England manager a nih hmaa a sulhnu erawh a ropui lo hle. Kum 2006 khan Boro zawmin manager a nih hmasak ber a ni a, 2006-2009 chhungin match 151 a kaihruai a, a win percentage chu 28.4% a ni.

Kum 35-a niha inkhelh chawlhsantu manager hian Boro a relegate pui hnuah pawh a enkawl chhunzawm a, mah se Championship table lama palina dinhmun an luah laiin ban a ni. Southgate-a'n Boro a chhuahsan hnuah January 2011 khan head of elite development ni turin Football Association a zawm a, August 2013 khan England Under-21 coach ni tura lakluh niin kum thum chhung atan contract a ziak.

Southgate-a'n kum 2015 European Championship U21 khel turin England a tlinpui a, mah se Three Lions rawlthar rual te hi group stage a paltlang pui zo lo.

Eng nge an sawi?

England defender Gary Cahill chuan, "Southgate hi pla-yer nichunga England tana major tournament-a lo inlan tawh a ni a, player anih laia tawnhriat a neih ṭhat miau avangin England kawr hak hlutzia hi a hrethiam a ni," tiin an manager chu England tana player pawimawh a nih ṭhin avangin manager ang pawn a hlawhtlin a rin.

Livepool captain leh Eng-land midfielder Jordan Henderson chuan, "Manager ṭha tak a ni a, a hun reilote chhung khan player-te nena thawhhona a ṭha em em a ni. Player-te hnenah an tihtur chiang takin a hrilh ṭhin a, an thusawi a ngaihthah ngai lo bawk," a ti.

FA executive hlui Adrian Bevington chuan, "Southgate hi England manager tur dik tak a ni a, international football kalphung hrechiangtu a ni. Player-ten a hnuaia khelh nuam an tih miau avangin he hna hi a phu a ni," tiin English manager chu a ringtawk hle.