Jeremy Lalrinnunga'n gold la leh ta

Jeremy Lalrinnunga chuan, 12th Sub-Junior Boy & Girls and 53rd Men & 28 women Junior National Weightlifting Championship neih mekah, Nilaini khan Mizoram tan gold medal a la.

Bhubaneswar, Odisha-ah hian Govt. Complex rawlthar Jeremy hian 56 kg category-ah khelin snatch (102kg) leh clean & jerk (129kg), total (231kg) chawiin gold a la. Mizo rawlthar dang Zakhuma chuan bronze medal la turin snatch (101kg) leh clean & jerk (126kg), total (227kg) a chawi ve bawk.

Nimin khan Mizo hming a mawi chhunzawm zel, 62kg category-ah Lalzuidika chuan (111kg) leh clean & jerk (132kg), total (243kg) chawiin bronze medal a la ve leh bawk a ni.

SYS coach, Mizoram team hruaitu Malsawma Khiangte chuan, "Ka naute hi naupangte la ni mah se an huaisen a, an theihna a sang bawk. An inhliam a nih loh chuan nakin zelah senior level-ah pawh beiseina ka nei sang khawp mai," tiin Vanglaini palai a hrilh.