Highlanders beiseina a nung thar

NorthEast United chuan Nilaini zan khan semifinal lut chiang tawh Delhi Dynamos chu 2-1 in an hneh a, semifinal lut turin beiseina thar an nei ve leh ta. Guwahati khawpuia inkhelah Highlanders tan Seityasen Singh chuan minute 60-naah goal hmahruai a khung a, Sevilla midfielder hlui Romaric chuan minute 71-naah an goal hnihna khung ve lehin Dynamos tan injury time-a Marcelinho goal khungin awmzia a nei tawh lo.

Highlanders rawlthar pathum Lallianzuala Chhangte, Jerry Mawi-hmingthanga leh Lalrempuia Fanai te tan NorthEast United-ah hmun a awm lo a, khelmualah an hmel hmuh tur a awm lo. Delhi Dynamos lamah erawh Lalchhawnkima'n inkhel bul a ṭan a, Chaltlang rawl-thar Malsawmzuala chu second half-ah tlan luhtir a ni bawk.

Hmabak

NorthEast United-in team ṭha zawka ngaih Delhi Dynamos an hneh a, Nilaini zan inkhelah hian chak lo se chuan semifinal luh beiseina nei tawh lo tur an ni. Mahse, High-landers-in hnehna an chang miau a, a thiam pali zinga tel leh tel loh chu an kutah chiah a innghat ta.

Kerala Blasters chuan palina dinhmun luah mekin Higlanders chung chiahah hian an awm mek a, team pahnih inthlauhna hi point khat chiah niin ISL league round match hnuhnung berah team pahnih hian semifinal luh an inchuh ang. NorthEast United tan semifinal lut turin chak ngei ngei a ngai a, Blasters tan point khat hlawhchhuah a tawk thung.

Highlanders tan a awlsam dawn lo - an inhmachhawnna tur hmun hi Blasters khelmual Jawaharlal Nehru Stadium Kochi-ah a ni a, Manchester City boss hlui Steve Coppell-a enkawl team hian engtik-laimahin fans an tlachham ngai lo. An fan-te ṭawiawmna nen semi-final luh ngei an tum dawn.

Vingada a phur

NorthEast coach Nelo Vingada chuan, "Point kan hlawh chhuak thei ang tih rinna nghet tak kan nei a, kan beiseina chhi nung tura a pawimawh zia pawh kan hria a ni. Beisei angin inkhel bul ṭan lo mah ila kan insiam ṭha thuai a, kan keeper TP Rehenesh khan min chhanhim a ni," a ti.

Portugal coach hlui chuan sawi chhunzawmin, "Zanina min
ṭawi-awm tura lokal fan-te hnenah lawmthu ka sawi duh a, semifinal kan luh theih rinna nghet tak an nei tlat a ni. He club neitu John Abraham chungah pawh ka lawm a, a pawimawh ber erawh player-te an ni. Beiseina kan neih zel theih nan an thawkrim a, hrehawm an tuar a, theihtawp an chhuah a ni," tiin a player-te a fak hle.

Vingada chuan Blasters nena an inkhel tur thlirlawkin, "Kerala hi team ṭha tak an nih avangin kan hma lawkah game hautak zetin min hmuak mek a ni," tiin game awlsam a beisei lo. Saudi Arabia boss hlui ni bawk chuan hliam vanga minute 12-na leka lak chhuah Argentine striker Nicolas Velez hliam dinhmun a la chian loh thu a sawi bawk.

Mimal Lawmman

Emerging Player of the Match Robin Gurung, NorthEast United

Hero of the Match Seityasen Singh, NorthEast United

Zanin Inkhel Tur

Atletico de Kolkata 07:00 PM FC Pune City