Zanin dar 7:00-ah cho leh cho Chanmari FC Vs Aizawl FC

Chanmari FC coach Lalsangzuala Hmar chuan, "Aizawl FC hi kan hmachhawn châk ber an ni," tiin Vanglaini palai a hrilh. Aizawl FC boss K. Malsawmkima chuan, "Châk leh châk kan intawng dawn a nih chu," tiin a chhâng lêt.

Zanin dar 7:00 hian Mizoram Premier League Season 5 semifinal-ah Chanmari FC leh Aizawl FC te an inhmachhawn dawn a, club lian pahnih hi MPL final hnuhnung pahnihah intawngin tun season-ah erawh club pakhat zawk tan chauh final ticket a awm.

Intluk tawk

I Day Football 2015 final-ah Mala kaihhruai Aizawl FC-in Sanga hoa khel Bethlehem VT hneh hramin nomawi an chawi a, hei hi coach pahnih intawn hmasak ber a ni.

Kumin I Day Football ṭanna inkhelah Chanmari FC-in Aizawl FC 2-1 in an hneh a, Sanga hote hi goal khat chauhin chak mah se inkhelah erawh an chungnung hle. Amaherawhchu Chanmari FC-in final an thleng lo, AFC-in nomawi an chawi thung.

MFA Super Cup final-ah an intawng leh a, Mala kaihhruai AFC-in inkhel thunun chungin 1-0 in hnehna an chang a, tun season-a a vawi hnih nan nomawi an chawi.

Chanmari mipui an hnual a, amaherawh-chu MPL5-a an intum hmasak berah Malsawmfela goal hmanga Aizawl FC an hneh avangin an phur thar hle. League round hnuhnung ber an khelh hmain Chanmari hruaitu zinga pakhat chuan, "Aizawl FC hi hneh a, semifinal-a hmachhawn ka duh. I League club hi season khata vawi nga hneh a châkawm," tiin Vanglaini palai a hrilh.

MPL5 league match hnuhnung berah Aizawl FC-in Chanmari FC barakhaihin 2-1 in an hneh a, semifinal-ah erawh an inhmachhawn dawn tho. Chanmari lungawi lohna tur erawh pakhatna ni chungin I League club an tawng dawn lo a, tun season-ah vawi nga hneh theih dan an nei tawh lo bawk.

Cho leh Cho

Vanglaini-in an inkhel hnuhnung ber chanchin, "AFC hian an chak chuan semifinal-ah Chanmari FC an hmachhawn thei tih hre rengin chak tumin an khel a, Sanga hoten an draw chuan I League club an pumpelh tih hre chungin an si phurh sut an tum thung," tiin a ziak a, Chanmari hian an cho lo zawk niin a lang.

Hemi chungchang hi Chanmari FC coach Lalsangzuala Hmar chuan in-sawifiahin, "Chhiarkawp chhut sual vang a ni. Aizawl FC kha kan draw chuan semifinal-ah kan tawng thei turah ka ngai a, chuvangin 2-1 a nih hnu khan draw ngei tumin Rinchhana leh Fela Zote te ka luhtir hial. Kan duh chu semifinal-a Aizawl FC hmachhawn hi a ni. Anni hi BVT leh Chanmari West aiin an ṭha lo zawk tihna lam a ni lo a, Aizawl FC hi kan hmachhawn châk ber an ni," tiin hriat fuh loh vanga draw tum an nih thu a sawi.

Semifinal chungchang thlirin Sanga chuan, "First leg-a chak hi kan ngai pawimawh. Kan tum ber chu chak nghal a ni a, hnehna kan chang a nih chuan second leg-ah pressure kan nei tlem ang. Tunah chuan Fela Zote chhawr theih turin a awm tawh a, Dodoz leh Ugo te pawh inhliam deuh mah se ngaihtuahawm an ni lo," tiin an foreigner pahnihte inkhel bul ṭan tura an la chian loh thu a sawi.

Aizawl FC boss erawhin Chanmari FC boss thusawi a pawm lo, K. Malsawmkima chuan, "Kei chuan a hriat sual ka ring lo, Chanmari FC coach thusawi chu ka pawm lo tawp. Keini chuan kan chak leh chak lohin Chanmari FC kan hmachhawn dawn tih kan hria a, kan theihna zawng zawng chhuahin kan chak. Tu nge dawt sawi zawk chu kan hre dawn alawm. Châk leh châk kan intawng dawn a nih chu," tiin a khingpui tur team a hlau lo hle.

Ralthuam lam

Chanmari FC-in Leonce Dodoz an kawl a, Ivorian forward hian AFC a hmachhawn hmasak ber ṭumin metre 50 chuang zet khalhin goal a khung teuh hle. Zaninah Dodoz hi en bik a sual lo ang a, Ivorian forward thawhrah seng ṭhintu Malsawmfela hi Aizawl FC tan ven uluk a ṭul bawk.

Ramhlun South tlangval Sawmfela'n goal 10 a khung tawh a, MPL5-a Aizawl FC an hneh ṭuma chakna goal khungtu a ni. Aizawl FC leh Chanmari FC vawi 20 inhmachhawn tawhnaah Sawmfela hian goal 7 a khung a, statistics leh thiamna thlirin Chanmari forward hi zanina ralthuam chhuanawm ber tur a ni.

Aizawl FC-in an defender pawimawh Lalramchullova leh midfielder ṭha Lalbiak-thanga te an chhawr thei dawn lo a, amah-erawhchu player ṭha pahnih tel lo hian Chanmari FC an hneh.

I League club hian tun season-ah foreigner an lak fuh tawk loh avangin semifinal-ah pawh hian Nigerian midfielder Eniwo Benjamin Onome an chhawr ngam a rinawm lo a, rawlthar player-ten tawnhriat nei player an thlawp ṭhat a ṭul ang.

Match hnuhnung berah academy aṭanga an thur chhuah Hmingthanmawia (Valpuia) chu defence laiah Jonathan Lalhriatkima nen awmin attacking nei ṭha Chanmari hmaah an thiamna an pholang. Tlar hma lamah F. Lalremsanga a rintlak ṭan a, MPL-a a goal hmasa ber Chanmari lama a khung chu goal ropui a ni.

AFC innghahna ber tur erawh keeper Zothanmawia, defender Ricky Lallawm-awma, midfielder Rohmingthanga leh for-ward Bright Middleton Mends te an ni ang.

History a pawimawh lo - Sanga

Aizawl FC-in Chanmari FC lakah vawi 13 hnehna an chang a, vawi 20 an inkhelh tawhah vawi khat chiah team pahnih hi inhnehtawkin Chanmari hi vawi ruk an chak thung.

Chanmari FC coach Sanga chuan, "Kan intum tawhna hi ka lo ngaihtuah miah lo a, hriat pawh ka hre lo. Chanmari record a ṭha lo a nih pawhin ka tan vawi leh khata siam ṭhat theih a ni lo. Aizawl FC chu keini aiin vawi 10 chuang pawhin lo chak tam pawh ni se semifinal-a kan hneh chuan a tawk," tiin a sawi a, a zam lo.

NGAIHNAWM

• AFC keeper Zothanmawia'n vawi 13 inkhel bul ṭanin vawi nga a clean sheet a, man of the match-ah vawi hnih thlan tawh niin goalkeeper zingah mimal chawimawina dawng ngun ber a ni.

• Chanmari FC-in keeper pathum an chhawr tawh a, MS Dawngliana chu vawi kua zet inlanin clean sheet vawi hnih nei mah se match hnuhnung paliah F. Lalmuanawma inlanin clean sheet vawi khat a nei tawh.

• Chanmari captain Lalrinchhana leh AFC keeper Zothanmawia te match zawng zawngah an inlan vek a, bench aṭangin ṭum khat ve ve an lut thung.

• Veteran midfielder Rohmingthanga chu minute 1003 chhung khelmualah a inlan a, AFC player zinga ani aia inlan tam chu Ricky Lallawmawma (1080 minutes) leh T. Mawia (1228) te chiah an awm.

• AFC tana goal khung tam ber chu Bright Mends niin goal li a khung tawh a, Lalramchullova'n goal thum a khung tawh bawk. Inhliam vangin Armed Veng tlangval Chullova hi semifinal-ah a inlan dawn lo.

• Chanmari tana goal khung tam ber Malsawmfela'n goal 10 a khung a; Vanlalbiaa Chhangte (3 Goals), Lalruatfela Zote (2) leh R. Malsawmtluanga (2) ten an dawt.

• Chanmari FC-in MPL5-ah player 25 an chhawr tawh a, Aizawl FC-in player 26 an chhawr tawh thung.