Arsenal ngui niah Man United an hlim

Arsene Wenger-a'n a ze ngai a la thlak lo! French manager hian EFL Cup quarter final-ah player naupang rual a chhawr leh a, an mikhual Southampton lakah 2-0 a tlawmin an tla. Gunners manager hian North London club kum 20 chhung a enkawl tawh aṭangin League Cup hi a la chawi miah lo.

Nilaini zan inkhel dangah Manchester United chuan Zlatan Ibrahimovic leh Anthony Martial te goal khung hmangin West Ham 4-1 a hnehin an tlang. Semifinal chin chu two-legged a khelh tawh tur niin nakkum January 6 leh 23 khian khelh a ni dawn - Man United hian Hull City an hmachhawn ang a, semifinal lehlamah Liverpool leh Southampton an inhmachhawn thung ang.

Arsenal an tla...

Emirates Stadium-a inkhelah Premier League lama chhawr rim hlawh Alexis Sanchez, Theo Walcott, Olivier Giroud leh Mesut Ozil te hmel hmuh tur a awm lo a, midfielder Aaron Ramsey, Alex Iwobi leh Mohamed Elneny ten inkhel bul an ṭan thung.

Kartawp inkhela Bou­rnemouth 3-1 a hnehtu player zinga 10 zet siksawi an nih avangin inkhel ṭantir aṭanga chungnung zawk chu mikhual Southampton an ni. Saints tan Jordy Clasie leh Ryan Bertrand ten chawlhlawk hmain goal an khung a, goal dang a lut zui lo.

Southampton hian Arsenal khelmualah result an nei ṭha ngai lo a, an zin chhuah hnuhnung vawi 23-ah ṭum khat chiah hnehna an chang. Saints hian League Cup semifinal an vawi thum luhna chiah a ni a, a sang pali zinga an tel hnuhnung ber chu kum 1986-87 season daih tawh kha a ni - kuminah hian match thum khel tawhin goal an la chhuah lo.

Quarter final chauh

Manager mahni thu duh tawk tak Wenger-a'n tun hma aṭangin League Cup hi player naupang zawk leh inelna lian zawka ngaih Premier League, FA Cup leh Champions League lama a chhawr ṭhan lohte tan hun a siamsak ṭhin a, tun thlengin a ze ngai hi a la kalsan lo.

Kum 67-a upa Wenger hi he inelnaah hian season 20 chhung zet chu a hlawhtling tawh lo a, tun hnaia quarterfinal vawi ruk an khelh aṭangin ṭum khat chiah an paltlang.

Saints lakah hian pound maktaduai 17 man Perez chuan October 25 hnua a vawi khat nan inkhel bulṭan mah se a ti kimtu mai a ni. Ramsey-a'n a hun
ṭha a chhawr ṭangkai theih loh bakah Reading an hneh ṭuma goal hnih khungtu Chamberlain chu goal hmaah a hriam tawk lo bawk.

Eng nge an sawi?

Arsenal manager Wenger chuan, "A lawmawm loh hle, kan khel chhia a, a bik takin first hlaf kha a chhe zual hle. Ka player ṭhenkhat kha inelna liana inlan ṭhin an ni a, kha khan he inelna hi kan ngaihnep loh zia a ti lang," a ti. Arsenal hi match 19 chhung zet hneh loh nei loa an kaltluang lai chu a tawp ta rih.

Southampton boss Claude Puel chuan, "Goal khung tura hun ṭha kan neih pahnihah kan hlawhtling nghal a, khatiang kha ka duhdan chu a ni. Ka naute khelh danah khan ka lawm takzet," tiin a sawi.

United an tlang

Manchester United-in kartawp inkhela 1-1 a an inhnehtawkpui West Ham an mikhual nawn a, result a danglam ta. Ṭan aṭanga minute hnihna lekah Ibrahimovic-a'n goal hmahruai a khung avangin Jose Mourinho naute tan thil harsa a awm zui lo.

Old Trafford-a inkhelah Martial chuan an goal hnih nan Henrikh Mkhitaryan pass a khung a, second half-ah France international hian Antonio Valencia siamsak a khung leh bawk - a bul ṭantu Ibra chuan hun tawp hma chiahin goal hnuhnung ber a khung leh. Hammers goal neihchhun hi United chhulchhuak Ashley Fletcher khung a ni.

Manchetser United hian hrem vangin khawvela player manto ber Paul Pogba bakah Marouane Fellaini an chhawr thei lo a, hun tawp dawnah Bastian Schweinsteiger chu March thla hnuaa vawi khat nan a rawn inlan ve bawk - Germany captain hlui hian minute 86-naah goal hnih khungtu Martial a rawn thlak.

Manchester United hian League Cup bikah hian an khelmualah sulhnu an nei ṭha hle, an match hnuhnung 25-ah vawi khat chiah chak loh an nei. Vawi 23 hnehna changin vawi khat an inhnehtawkpui. An chak loh hnuhnung ber chu kum 2005 January thlaa Chelsea 2-1 a an hneh loh kha a ni.

United manager Mourinho chuan, "Feye­noord kan khelh ṭum ang mai khan na takin kan nawr a, kha kha United khelh dan hmang a ni. Goal kan khung bakah ka naute khelh dan khan min ti lawm a ni,"
tiin a sawi.

West Ham manager Slaven Bilic chuan, "Keini aiin tharum an ngah bakah an theihna san zawk zia kan hmu a, chak zawk nih an phu," tiin a sawi ve bawk.