Real tana goal khungtu Zidane-a fapa

Zinedine Zidane-a fapa Enzo Zidane chuan Real Madrid tana a match hmasa berah goal a khung nghal a, Nilaini zan khan Copa del Rey last 32-ah Cultural Leonesa chu 6-1 in an sawp.

December 3 zana El Clasico khel tur Real tan chuan Leonesa an mikhualna inkhel hi 'warm up' satliah ang mai a ni a, second 23-na lek aṭangin goal an khung ṭan. Cristiano Ronaldo, Karim Benzema leh Luka Modric-te hahdamtir an nih zanah hian striker Mariano chuan an goal hmasa ber hi a khung a, Zidane-a hnuaia Real goal khung rang ber a ni.

Real tana a vawi khat nana inkhel bul ṭan Mariano hian hattrick a siam zui a, Colombia captain James Rodriguez chuan goal khat a thawh ve bawk. Real-in goal khung an harsat loh tehlul nen Cesar Morgado chuan mualneitu team hi goal khat a 'khilai' a, Leonesa tana Yeray Gonzalez goal khungin nghawng a nei phak lo.

Zidane-a naute hian first leg-ah an khingpui third division club hi 7-1 in an sawp tawh a, inkhel pahnih belhkhawmah 13-2 a hnehna changin last 16 an lut chiang hle.

Enzo chuan, "Real Madrid tana ka match hmasa bera goal khung hi ka lo suangtuah fo tawh ṭhin a, Santiago Bernabeu-ah ngei hnehna kan chan ṭuma ka duhthusam a thleng hi ka hlim takzet a ni," a ti.

Barca chak zo lo

Luis Enrique-a'n Nou Camp-a Real an mikhual tur hisapin an league match hnuhnung bera Real Sociedad inhneh-tawkpui team aṭangin player 11 ngawt a siksawi a, Hercules chu khualmualah 1-1 in
an inhnehtawkpui.

Spanish second division club tan David Mainz chuan minute 52-naah goal hmahruai khung mah se Catalan club tan Carles Alena a inlar a, kum 18-a upa rawlthar duhawm hian Barcelona tana a match hmasa berah goal a khung nghal a ni.

Barcelona tan beiseina a la tawp chuang lo a, Spanish second division club hi Nou Camp-ah Copa del Rey second leg match khelhpui turin an lo mikhual leh ang.