2nd leg atan a hmuhnawm tur an dah ṭha Chhinga Veng 0 - 0 Electric Veng

Chhinga Veng leh Electric Veng ten fimkhur takin Mizoram Premier League Season 8 semifinal first leg an khel a, Nilaini zana inkhel entuten goal hmuh tur an nei lo.

Second leg-ah erawh risk lak a ṭul tawh dawn a, December 10, Thawhlehni zana RG Stadium-a an inkhel tur a nghahhlehlawm ta hle.

MPL-ah final khel tur zawnna hi double leg-a khelh a ni a, minute 180 chhunga chak zawk an awm loh chuan penalty hmanga chak zawk chinfel tur a ni. Chhingcows leh Electric Veng inkarah chan ṭha zawk an awm lo.

Chhinga Vengin inkhel bul ṭantu zingah rawlthar duhawm C. Lalchungnunga an dah lo a, chutih rualin Zotuitlang rawlthar aia lut Farkawn tlangval Malsawmdawnga a nih miau avangin tu nge ṭha zawk tih chu inhnialna tham a tling. Chhingcows hian an foreign forward ṭha Ouattara Sie an nei a, bench-ah an ṭhuttir thung a, a aiah goal 11 khung tawh MC Malsawmzuala'n bul a ṭan zawk.

Electric Vengin season liam taa an club top scorer David Lalchhuanawma leh captain Jacob Lalrawngbawla te chu bench-ah an dah thei a, coach Lalsangzuala Hmar-in squad a nei ṭha thawkhat tiin a sawi theih.

Team pahnihin second leg hre chungin bul an ṭan a ni ber a, ball inpe kual tam mah se goal hlauhawm neih an harsat. Chhinga Veng lamin goal an khung teuh hle a, Ṭhasiama ball pet chu goal-ah a lut dawn emaw a tih hnuah goal ban a per.

Electric Veng pawhin freekick hmangin second half-ah goal khung theihna tur an nei a, substitute Jacob-a'n box pawn chiah aṭangin goal keeper zawnah a pet. Chhingcows keeper Dharmindar Guru-a'n box pawna  ball a man vanga a freekick chawi chu Ramhlunchhunga'n a pet a, hei hi Dharmindar hian ṭha zetin a dang.

Hun tawp hma hretin Chhing-cows winger Sawmdawnga'n amah thlawptu Lalsawmzela pe loin goal-a pet a thlang a, a tisual - keeper tan harsa tur a awm lo. Minute 90 chhungin inkhel a hmuhnawm tawk lo - an inhlautawn a ni ber. Inkhelh hmabak erawh inhlauhin awmzia a nei lo ang. 

Chhinga Veng coach Anand Gurung chuan, "Kan fimkhur hret a ni. Second leg-ah chuan a dang tawh ang," tiin goal khung tura nawr nat zawk an tum thu Vanglaini a hrilh. Electric Veng coach Lalsangzuala Hmar chuan, "Semifinal hmain training-na hmun kan nei ṭha lo a, chu chu kan inkhelah a lang," tiin an khel ṭha tawk lo tih a pha lo.