India tan Didiki'n goal a khung

Ram pathum hockey hmanga inelna 3-Nations Tournament khelh laiah Nilaini khan India junior team chuan an match hmasa ber an khel a, India tan hian Lalrindiki chuan goal khat khungin New Zealand lakah 2-0 in hnehna an chang.

India tan Hnahthial tleirawl Didiki bakah hian midfielder Prabhleen Kaur chuan goal khat a khung ve bawk - New Zealand lamin a chhan letna an nei lo. India hian nizan khan inelna thlengtu Australia an hmachawn leh nghal a, result kan hre hman lo.

Inelnaah hian India, New Zealand leh Australia te vawi hnih ṭheuh an inkhel kual dawn. India tan Didiki bakah hian Mizo player dang Marina Lalramnghaki chu a feh chhuak ve bawk.