PSG khelmuala leng tur Spurs

North London derby-a mualpho hlim Tottenham Hotspur chuan zanin dar 1:30 hian Champions League match khel turin Paris St-Germain an lenchilh dawn a, hnehna an chan chuan Thomas Frank-a leh naute chungah Spurs ṭantuten rinna an nghat leh thei ang.

PSG hian tun hnaiah beisei ang result an nei bik lo - season hmasa treble champion hian ṭum dang angin Ligue 1 pawh an thunun tawk lo. Table chung ber luah mah se, match 13 khelh tawhah vawi kua chiah an la chak a, vawi thum draw neiin, vawi khat an tlawm.

Ligue 1 pahnihna Marseille leh pathumna Lens aia an sanna hi point hnih chauh a ni a, UCL-ah pawh an ropui chuang lo - an match hmasa pathumah chak mah se, match hnuhnung berah Bayern Munich chu 2-1 in an ngam lo.

Paris club hian an ṭhat dan berin Spurs hi an lo mikhual thei dawn lo bawk. Moroccan right back Achraf Hakimi chu Bayern nen an inkhelh ṭumin a inhliam a, Desire Doue leh Ballon d'Or dawngtu Ousmane Dembele te hliam vangin an la chawl bawk.

Mahse, Luis Enrique-a'n Bradley Barcola leh Khvicha Kvaratskhelia a la neih tho avangin, Spurs tlarhnung chhaih buai tur khawp squad a la nei tih a chiang a, midfield-ah Fabian Ruiz leh Vitinha an la awm cheu bawk - an ṭha.

Tun season-ah Spurs-in tluk leh din an fawm a, hetihruala sawi hlawh lo tak chu player inhliam an kawl nual chu a ni - James Maddison, Radu Dragusin, Kota Takai, Dejan Kulusevski, Dominic Solanke leh Yves Bissouma te chu hliam vangin an la chawl vek!

Spurs player inhliam en ila, chhiatpui tham a ni tih a chiang a, chutihrual chuan an league match hnuhnung pathuma chak zo tawh lo team hian zaninah hnehna an chang lo a nih chuan fan-ten an chungah zahngaihna an lantir lo ang.

London club player zingah Xavi Simons chu PSG player hlui niin, Randal Kolo Muani chu French club aṭanga loan-a an hawh mek a ni bawk a, an club hlui laka hnehna chan an châk khawp ang - Arsenal laka yard 40 vela hla aṭanga goal khungtu Richarlison pawhin striker ṭha a nihzia a pholan a hun.