Atletico khelmualah Inter Milan

Tun season Champions League-a tlawm la nei lo Inter Milan-in fiahna hautak an hmachhawn dawn a, zanin dar 1:30 hian Atletico Madrid chu khualmualah an lenchilh dawn.

Inter hi an 'puja' fuh lai ber a ni lo. Serie A an match hnuhnung berah Milan derby khelin, an hmelma AC Milan chu 1-0 in an ngam lo a, Milan derby khelh hmaa Serie A hmahruaitu hi tunah chuan table-ah palina an ni mek.

Champions League lamah pawh Inter hi match li an khelh tawhah chak vek mah se, team langsar hmachhawn an la nei lo - an hmachhawn tawhte hi Ajax, Slavia Prague, Union St-Gilloise leh Kairat an ni a, inchhuan viauna tur a awm lo!

Italian club hian UCL bikah Atletico zawhah hian Liverpool, Arsenal leh Borussia Dortmund an hmachhawn dawn a, tuna chak loh la nei lo club hi UCL last 16 lut lo thei an ni ve tho - an hmabak a hautak a, Atletico hi an chingfel thei a nih chuan inrintawkna an nei ang.

Hetihrual hian Atletico hi beisei anga season bul ṭan lo, tun hnaia result nei ṭha chho an ni a, an phur vanglai tak a nih avangin an buzawla va hneh hi thil awlsam a ni dawn lo.

Atletico Madrid hian UCL-a match li an khelh tawhah vawi hnih chiah chak an la nei a, Liverpool (3-2) leh Arsenal (4-0) lakah an tlawm tawh - club lian an hmachhawnah an la chak lo ve ve a, he result duhawm lo hi thaibo an duh dawn.

League lamah chuan Atletico hi match nga a zawnin an chak tawh a, season ṭantira champion beiseina bo hman dawn dawn tawha kan sawi team khan point li chauhin hmahruaitu Real Madrid an phak lo tawh.

Diego Simeone-a'n La Liga-a an thawnthu duhawm lo chu ngaihnawm takin a her dik mek a, Champions League lamah pawh Inter Milan hmangin thawnthu ngaihnawma bul ṭan a tum ang.